“Xitay iqtisadining téz tereqqiy qiliwatqanliqi” guman qozghimaqta

Washin'gtondin muxbirimiz uyghar teyyarlidi
2024.12.12

12-Dékabir, “Iqtisadshunas” (Economist) zhurnilida élan qilin'ghan “Eger xitay iqtisadi hökümet da'iriliri dégendek közligen meqsetke yetken bolsa, némishqa pul paxalliqi shunche töwen bolidu” namliq bir maqalide, xitay iqtisadining xitay da'iriliri dewatqandek ehwalda emesliki, xitay iqtisadining téz tereqqiy qiliwatqanliqi heqqidiki melumatlarning guman qozghaydighanliqi otturigha qoyulghan.

Maqalide mundaq déyilgen: “Xitayning siyaset belgiligüchiliri pul siyasitini boshitish, hökümetning qerz élishini kéngeytish we pul-mu'amile organlirini kücheytish arqiliq iqtisadni heriketlendüreleydu. Bu heqte qilalaydighan köp ishlar bar. Emma tehlilchiler xitay iqtisadining unche téz tereqqiy qiliwatqanliqigha guman bilen qaraydu”.

“Iqtisadshunas” zhurnili analizchi gaw shenwén (Gao Shanwen) ning sözidin neqil keltürüp mundaq dégen: “Xitay iqtisadining üch pirsent kémiyishi, yeni bu yil texminen %5 tin %2 ke töwenlishining pul paxalliqi bilen bolghan munasiwiti normal emes. Xitayning ilgiri omumiy ishlepchiqirish qimmiti (GDP) téz ashqan, emma yéqindin buyan yaxshi emes. Xitay küch quwwiti qalmighan qérilar, ishsiz yashlar we ümidini yoqatqan ottura yashliqlar bilen tolup tashti”.

“Wol-sitrét zhurnili” gézitining obzorchisi woltir rasil mid (Walter Russell Mead) yéqinda xitay iqtisadi heqqide bir parche maqale yézip, xitayning özi kolighan origha özi chüshüwatqanliqini, xitay iqtisad modélining dawam qilalmaydighanliqini ilgiri sürgenidi. U, buning asasliq sewebini körsitip, “Hazir xitayning bezi yerliride 2021-yildin buyan öy bahasi texminen %30 chüshüp ketti. Sana'ette tapqan paydisi ötken bir yilda %17.8 Töwenlidi. Yashlarning ishsizliq nisbiti dawamliq ashmaqta. Chet ellikler meblegh sélishni xalimaywatidu” dégenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.