Xitay iranning özini qoghdishini qollaydighanliqini bildürgen

Iran bilen isra'iliye arisidiki toqunushning kéngiyip kétishidin saqlinishqa chaqiriliwatqan bir waqitta, xitay tashqi ishlar ministiri iranning özini qoghdishini qollaydighanliqini bildürgen.

Roytérs agéntliqining xewer qilishiche, xitay tashqi ishlar ministiri wang yi 11-awghust küni iran muweppeq tashqi ishlar ministiri aliy baghéri kani bilen téléfonda sözliship, xitay iranning “Igilik hoquqi, bixeterliki we izzet-hörmiti” ni qoghdishini qollaydighanliqini éytqan. Wang yining, iranning yéqinda pelestin islami jihad herikiti xamasning siyasiy rehbiri xaniyening téhranda qestlep öltürülüshidin öch élishi toqunushning kéngiyip kétishini keltürüp chiqirishidin endishe qiliniwatqan bir waqitta iranni qollaydighanliqini bildürüshi diqqet qozghimaqta. Xitay izchil ottura sherqte toqunush peyda qilip, amérikani bu rayon'gha qayta paturup qoyush üchün qutratquluq qilmaqta, dep eyiblinip kelgenidi.

Roytérsning bildürüshiche, söhbette wang yi isra'iliyening ismayil xaniyeni qestlep öltürüshini qayta eyiblep, bu qestlesh herikitini iranning igilik hoquqigha xilapliq qilghanliq, dep körsetken. Xitay tashqiy ishlar ministirliqining élan qilghan bu heqtiki bayanatida wang yi mundaq dégen: “Xitay iranning igilik hoquqi, bixeterliki we döletning izzet-hörmitini qanun boyiche qoghdishini, shundaqla rayonning tinchliqi we muqimliqini qoghdash tirishchanliqini qollaydu hem iran bilen qoyuq alaqini saqlashqa teyyar turidu”.

Bayanatta tekitlinishiche, wang yi yene ismayil xaniyening öltürülüshining “Ghezza urush toxtitish söhbiti we rayonning tinchliqi, muqimliqigha buzghunchiliq qilghanliqi” ni ilgiri sürgen. Isra'iliye xaniyening öltürülüshige mes'ul ikenlikini bildürmigen yaki ret qilmighan bolsimu, emma bu weqe isra'ilye-xamas urushining ottura sherq toqunushigha aylinip kétish endishisini qozghap kelgen. Melum bolushiche, nöwette amérika dölet mudapi'e ministiri liloyid awstin, amérikaning bashqurulidighan bomba su asti paraxotining téximu téz sür'ette rayon'gha méngishini buyrughan.