Xitay bilen iran “Shinjang yaxshi jay” témisida widiyoluq yighin ötküzgen

Xitay hökümitining bashqa döletlerning közini boyash qilmishliri her waqittikidin bek köpiyip kétiwatqan bolup, qolliniwatqan hiyle-neyreng wasitilirimu köp xillishishqa bashlighan.

Xitay taratqulirining xewirige qarighanda, 13-séntebir küni Uyghur aptonom rayonluq hökümet iranning xitayda turushluq elchixanisi bilen “Shinjang yaxshi jay” témisida widiyoluq söhbet ötküzüp, “Shinjangdiki muqimliq we tereqqiyat netijiliri” ni namayan qilip, amérika bashchiliqidiki gherb küchlirining “Xitaygha qarshi sepsetiliri” ge reddiye bergen.

Yighinda Uyghur aptonom rayonluq xelq qurultiyi da'imiy komitétining mudiri shawket imin gherb küchlirining shinjangni qorqunchluq körsitishke urunup kelgenlikini, “Xitay shinjangda irqiy qirghinchiliq yürgüzüwatidu” dégen gepning “Insaniyet tarixidiki eng chong töhmet” ikenlikini otturigha qoyghan. Uyghur diyarining her qaysi jayliridin kelgen “Kursantlar”, imamlar, sirtqa chiqip ishlep pul tapqanlar wekilliri özlirining bextlik ikenlikini teshwiq qilghan.

Iran wekilliri bu qétimliq yighin arqiliq xitay hökümitining shinjanggha neqeder köngül bölgenlikini hés qilghanliqini, özliriningmu u yerge barghanda bu rayondiki chong tereqqiyatni körgenlikini bayan qilishqan.

Tehlilchiler xitayning bundaq pa'aliyetlirining iran bilenla toxtap qalmaydighanliqini, xitay özi muhim dep qarighan qoshniliridin pakistan, afghanistan we bashqa dölet elchixaniliri bilenmu bu shekilde widiyoluq yighin ötküzüshi mumkinlikini, emeliyette buning yighin emes, xitayning izchil dawam qilip kéliwatqan köz boyamchiliq, teshwiqat oyuni ikenlikini bildürdi.