Хитайға җасуслуқ қилған америкадики хитай инженер 8 йиллиқ кесилгән

Хитай даирилири үчүн җасуслуқ қилған америкадики хитай инженер җи чавчүн 8 йиллиқ қамақ җазасиға һөкүм қилинған.

“җәнубий хитай әтигәнлик гезити” ниң хәвәр қилишичә, җи чавчүн 2013-йили оқуғучилиқ визиси билән америкаға кәлгән вә бу йәрдә армийәгә қатнашқан. У бу җәрянда хитайниң җяңсу өлкилик дөләт хәвпсизлики назарити үчүн ишләп, уларниң өзигә хизмәт қилдуридиған бир қисим америкалиқ алим вә инженерларни ениқлап чиқишиға ярдәм бәргән.

Мәлум болушичә, җяңсу өлкилик дөләт хәвпсизлики назарити американиң санаәт вә сода мәхпийәтликини қанунсиз қолға кәлтүрүш үчүн нурғун пиланларға қатнашқан болуп, у хитайниң муһим истихбарат органлириниң бири икән.

Җи чавчүн 2018-йили 9-айда қолға елинғучә болған арилиқта, хитай истихбаратини сәккиз кишиниң тәрҗимиһали билән тәминлигән, уларниң һәммиси әсли хитай яки тәйвәндин кәлгән вә яки кейин америка пуқралиқиға өткән кишиләр икән. Бу дело хитайниң американиң охаййо шитатиға җайлашқан вә дунядики алдинқи қатарда туридиған айропилан матори ишләпчиқарғучиларниң бири болған GE авиатсийә ширкити вә шундақла америка армийәсиниң тәминлигүчиси болған башқа авиатсийә шеркәтлириниң сода мәхпийәтликини оғрилаш урунушлири билән мунасивәтлик икән.

Хәвәрдә көрситилишичә, 31 яшлиқ җи чавчүн, җяңсу өлкилик дөләт хәвпсизлики назаритиниң муавин бөлүм башлиқи шү йәнҗүнниң көрсәтмиси билән һәрикәт қилған болуп, шү йәнҗүн хитайниң бу истихбарат һәрикитидики муһим шәхс икән. У 2018-йили белгийәдә қолға елинип, америкаға өткүзүп берилгән вә 2022-йили 11-айда җасуслуқ җинайити билән 20 йиллиқ қамақ җазасиға һөкүм қилинған.