Amérika fédératip tekshürüsh idarisige yoshurun'ghan xitay jasus qolgha élindi

Yéqinda amérika qanun orunliri uzun yillardin buyan merkiziy axbarat idarisi (CIA) da xitay hökümiti üchün jasusluq qilip kelgen yuk chingmani resmiy qolgha aldi.

“Nyo-york waqti” gézitining 18-awghusttiki xewiride éytilishiche, toluq ismi aléksandir yuk chingma bolghan bu xitay eslide xongkong puqrasi bolup, 1980-yillardin buyan merkiziy axbarat idariside ishligen. 2000-Yilidin kéyin fédératip tekshürüsh idarisige yötkelgen iken.

Xewerde éytilishiche, bu yil 67 yashqa kirgen jasus gumandari yuk chingma we uning yene bir tughqini 2001-yili merkiziy axbart idarisi xadimlirining xususiy uchurlirini, shuningdek ularning xitaydiki “Köz-qulaqliri” bilen bolghan alaqini qandaq yoshurudighanliqi heqqidiki bir qisim mexpiy melumatlarni xitay istixbarat orunlirigha yetküzüp bergen. Buning bedilige uninggha xitay saqchiliri 50 ming dollar bergen. Yuk chingma ötken hepte qolgha élin'ghan bolup, uninggha ömürlük qamaq jazasi bérilidighanliqi éhtimalgha tolimu yéqin iken.

Amérika qanun orunlirining bildürüshiche, 2010-yilidin 2012-yilighiche bolghan ariliqta amérika merkiziy axbarat idarisining xitaydiki nechche onlighan “Köz-qulaq” liri ushtumtutla qolgha élinip, étip tashlan'ghan. Buning bilen amérikaning xitaydiki barliq axbarat toplash tori biraqla weyran qiliwétilgen iken. 2019-Yilining özidila merkiziy axbarat idarisining xadimliridin ikki kishi xitaygha jasusluq qilish bilen eyiblinip, 20 yilliqtin qamaqqa höküm qilin'ghan idi.