Jasus gumandari linda sun 2021-yili nyu-york ishtat bashliqining Uyghur mesilisini tilgha élishigha tosqunluq qilghan

Nyu-york ishtatining sabiq bashliqi andiri kumo (Andrew Cuomo) we nöwettiki ishtat bashliqi ketiy xokul (Kathy Hochul) ning qol astida muhim wezipilerni ötigen linda sun isimlik xitay ayalning 9-ayning 3-küni jasus gumandari bolup tutulghanliqi küchlük ghulghula qozghimaqta. Nöwette linda sunning eslide xitay hökümitining adimi ikenliki, shundaqla xitay hökümiti üchün ishligenliki heqqide téximu köp tepsilatlar otturigha chiqmaqta.

Fédératsiye teptishining bildürüshiche, linda sun nyu-york ishtatining bashliqi ketiy hokulning qol astida kadirlar bölümining mu'awin bashliqi bolushtin ilgiri ishtatliq hökümette köpligen muhim wezipilerni ötigen hemde hoquqidin paydilinip, xitay hökümitige paydiliq ishlarni qilghan. Mesilen, teywen hökümiti wekilining nyu-york ishtati bashliqining ishxanisigha kirishige tosqunluq qilghan, nyu-york ishtati hökümitining höjjitini yalghandin yasap chiqqan.

“Muhapizetchi” torining 4-séntebir küni bergen xewirige qarighanda, linda sun 2021-yilila xitayning nyu-yorktiki konsulxanisi bilen alaqiliship yürgen bolup, hazirqi ishtat bashliqi xokul bilen xitay konsulini xitayning bayram künliride widiyoluq körüshüshke orunlashturghan hemde bu söhbette peqet dostane paranglishishni, bezi mesililerni siyasiylashturmasliqni tewsiye qilghan. Linda sunning bashqa bir emeldargha éytishiche, u xokulning nutqini teyyarlap béridighan katip bilen soqushup qalghan؛ sewebi katip bu nutuq tékistide xitaydiki Uyghurlar mesilisini tilgha élishta ching turghan. Linda sun bu nutuqta Uyghurlar mesilisining tilgha élinmasliqi kéreklikini, bundaq ishning yüz bérishige yol qoymaydighanliqini bildürgen hemde meqsitige yetken. Netijide nutuq tékistide Uyghurlar mesilisi tilgha élinmighan. Eyibnamide linda sunning bu qilmishimu otturigha qoyulghan.

Xewerde éytilishiche, linda sun nyu-york ishtatliq hökümette 15 yil ishligen, 2023-yil xizmitidin istépa bergen. Halbuki, ishtat bashliqi kohulning ishxanisidiki bayanatchining sözige qarighanda, hökümet uning xizmitidiki namuwapiq qilmishlarni bayqighanliqi üchün uni ishtin boshatqan.

Linda sun bilen éri 9-ayning 3-küni nyu-yorktiki öyide tutqun qilin'ghandin kéyin, sotta özlirini “Gunahsiz” dep dewa qilishqan. Sotchi, linda sundin 1 milyon 500 ming dollar, éridin 500 ming dollar képillik puli élip qoyup bergen, 9-ayning 25-küni ular qayta sotlinidiken.