Хитайларниң америкадики җасуслуқ қилмишлири көпләп паш болмақта

Мухбиримиз әзиз
2019-09-17
Елхәт
Пикир
Share
Принт

Хитайларниң америкадики қанунсизлиқ қилмишлири даим хитай һөкүмити билән бағлинишлиқ болуп чиқмақта. 16-Сентәбир күни федератсийә тәкшүрүш идариси қолға алған лю җоңсән исимлик хитай кишиму шундақ болған. «Төпилик» гезитиниң хәвиридә ейтилишичә, лю җоңсән йеқинда хитай һөкүмитидә ишләйдиған бир хизмәтчиниң америка визиси елиш алдамчилиқиға биваситә ярдәмләшкәнлики үчүн тутулған.

Хәвәрдә ейтилишичә, лю җоңсән буниңдин илгириму виза алдамчилиқи усули билән хитай һөкүмитиниң бир аял хизмәтчисигә америкаға кириш визиси елип бәргән. Америка әдлийә министирлиқиниң ярдәмчи министири җон демерис бу һәқтә сөз қилип «биз чәтәллик оқуғучилар вә тәтқиқатчиларниң, җүмлидин хитайларниң америкаға келишини қарши алимиз. Әмма һөкүмәтниң һамилиқидики виза алдамчилиқиға йол қоялмаймиз» дегән.

Мушу һәптидә федератсийә тәкшүрүш идариси қолға алған җу йү вә чен ли исимлик әр-аялму теббий мәхпийәтликни оғрилап сетиш билән әйибләнгән. «Форбес» журнилиниң хәвиридә ейтилишичә, мәзкур әр-аял охайо штатидики «дөләтлик балилар дохтурханиси» да ишләш җәрянида мәзкур дохтурханиниң узун йиллиқ тәтқиқат нәтиҗисиниң җәвһири болған һүҗәйрә екзосоми техникисини оғриливалған һәмдә хитайда мушу техника бойичә бимарларни давалайдиған тунҗи мәркәзни қурған. 2017-Йили мәзкур мәркәзни барлиқ техникилири билән қошуп 150 милйон америка доллириға сетивәткән. Мәлум болушичә, һүҗәйрә екзосоми техникиси үчүн америка һөкүмити өткән он нәччә йил җәрянида ғайәт зор мәбләғ салған болуп, теббий давалаш саһәсидики дәвр бөлгүч давалаш усуллириниң бири, дәп қарилип кәлгән икән.

Хәвәрдә ейтилишичә, америка қанун орунлири нөвәттә хитай һөкүмитиниң биваситә ярдими билән қурулған «чаңҗяң алимлири», «миң талант игилири» дегәндәк хитай җәмийәтлириниң америкадики тинимсиз паалийәтлиридин әндишигә чүшмәктә икән. Чүнки бу хилдики җәмийәтләр америкада қанунлуқ тизимға алдурулған болсиму, уларниң көп қисми әмәлийәттә биваситә һалда хитай һөкүмитиниң вә хитай компартийәсиниң җасуслуқ қилмишлири үчүн хизмәт қилидикән. Йәнә келип бу хилдики җәмийәтләр чәтәлдики хитай нәслидин болған кишиләрни «өзлири игилигән әң йеңи пән-тәтқиқат нәтиҗилирини елип улуғ вәтәнгә қайтиш» қа чақириқ қилидиған болғачқа бу кишиләрниң америкидики паалийәтлири һәрқачан қанун орунлириниң диққитидә болуп кәлмәктә икән.

Пикирләр (0)
Share
Толуқ бәт