Xitaylarning amérikadiki jasusluq qilmishliri köplep pash bolmaqta

Muxbirimiz eziz
2019-09-17
Élxet
Pikir
Share
Print

Xitaylarning amérikadiki qanunsizliq qilmishliri da'im xitay hökümiti bilen baghlinishliq bolup chiqmaqta. 16-Séntebir küni fédératsiye tekshürüsh idarisi qolgha alghan lyu jongsen isimlik xitay kishimu shundaq bolghan. "Töpilik" gézitining xewiride éytilishiche, lyu jongsen yéqinda xitay hökümitide ishleydighan bir xizmetchining amérika wizisi élish aldamchiliqigha biwasite yardemleshkenliki üchün tutulghan.

Xewerde éytilishiche, lyu jongsen buningdin ilgirimu wiza aldamchiliqi usuli bilen xitay hökümitining bir ayal xizmetchisige amérikagha kirish wizisi élip bergen. Amérika edliye ministirliqining yardemchi ministiri jon déméris bu heqte söz qilip "Biz chet'ellik oqughuchilar we tetqiqatchilarning, jümlidin xitaylarning amérikagha kélishini qarshi alimiz. Emma hökümetning hamiliqidiki wiza aldamchiliqigha yol qoyalmaymiz" dégen.

Mushu heptide fédératsiye tekshürüsh idarisi qolgha alghan ju yü we chén li isimlik er-ayalmu tébbiy mexpiyetlikni oghrilap sétish bilen eyiblen'gen. "Forbés" zhurnilining xewiride éytilishiche, mezkur er-ayal oxayo shtatidiki "Döletlik balilar doxturxanisi" da ishlesh jeryanida mezkur doxturxanining uzun yilliq tetqiqat netijisining jewhiri bolghan hüjeyre ékzosomi téxnikisini oghriliwalghan hemde xitayda mushu téxnika boyiche bimarlarni dawalaydighan tunji merkezni qurghan. 2017-Yili mezkur merkezni barliq téxnikiliri bilen qoshup 150 milyon amérika dollirigha sétiwetken. Melum bolushiche, hüjeyre ékzosomi téxnikisi üchün amérika hökümiti ötken on nechche yil jeryanida ghayet zor meblegh salghan bolup, tébbiy dawalash sahesidiki dewr bölgüch dawalash usullirining biri, dep qarilip kelgen iken.

Xewerde éytilishiche, amérika qanun orunliri nöwette xitay hökümitining biwasite yardimi bilen qurulghan "Changjyang alimliri", "Ming talant igiliri" dégendek xitay jem'iyetlirining amérikadiki tinimsiz pa'aliyetliridin endishige chüshmekte iken. Chünki bu xildiki jem'iyetler amérikada qanunluq tizimgha aldurulghan bolsimu, ularning köp qismi emeliyette biwasite halda xitay hökümitining we xitay kompartiyesining jasusluq qilmishliri üchün xizmet qilidiken. Yene kélip bu xildiki jem'iyetler chet'eldiki xitay neslidin bolghan kishilerni "Özliri igiligen eng yéngi pen-tetqiqat netijilirini élip ulugh weten'ge qaytish" qa chaqiriq qilidighan bolghachqa bu kishilerning amérikidiki pa'aliyetliri herqachan qanun orunlirining diqqitide bolup kelmekte iken.

Toluq bet