Xitay hökümitining gérmaniyediki jasusluq qilmishliri pash boldi

Yéqinqi mezgillerde xitay hökümitining yawropadiki jasusluq heriketliri arqimu-arqidin pash boluwatqan bolup, gérmaniye istixbarat organliri parlamént mejliside “Xitaygha qarita dawamliq sebiylerche köz qarashta bolush chong xataliq” dep eskertti.

“Gérmaniye dolqunliri” ning 18-öktebirdiki xewiride éytilishiche, “Gérmaniye fédératsiye istixbarat mulazimiti” (BND) ning diréktori bruno kal (Bruno Kahl) 17-öktebir küni ötküzülgen guwahliq bérish yighinida xitay hökümitining gérmaniyediki jasusluq heriketlirining ewj élip ketkenlikini tekitlep “Xitay bilen bolghan alaqide biz diqqet qilishqa we mukemmelleshtürüshke tégishlik köpligen nuqtilar mewjut” dégen. Mezkur organ qarmiqidiki üch idarining mes'ulliri guwahliq bérish yighinida xitayning yillardin buyan gérmaniyede jasusluq pa'aliyetlirini dawamlashturup kelgenlikini, emma gérmaniye siyasiy sahesining herqachan iqtisadiy menpe'etni siyasiy bixeterliktin ela bilip bu heqtiki agahlandurushlargha sel qarap kelgenlikini tekitligen. Gérmaniye “Asasiy qanunni himaye qilish fédératsiye ishxanisi” ning diréktori xaldénwang (Haldenwang) bu heqte söz qilip “Rusiyening jasusluqi bir qétimliq chaqmaq chéqish bolsa xitayning jasusluqi kilimat özgirishtur” dégen.

Xitayning bu xildiki jasusluq heriketliri téxi yéqinda en'gliye teweside zor diqqet qozghighan bolup, buning addiyghina urunush emes, eksiche ghayet zor sistémigha aylan'ghan heriket ikenliki deslepki qedemde melum bolghanidi.