Amérikadiki 13 xitay jasusluq bilen eyiblendi

“Washin'gton pochtisi” gézitining 24-öktebirdiki xewiride éytilishiche, amérika edliye ministirliqi oxshimighan üch délogha chétishliq 13 neper xitay puqrasining jasusluq bilen eyiblinip qolgha élin'ghanliqini jakarlighan.

Xewerde éytilishiche, bu déloning ikkisi nyu-york shtatida pash bolghan. Ularning biride xitay jasusliri amérika hökümiti jaza élan qilghan “Xu'awéy” shirkitini tekshürüsh xizmitige tosqunluq peyda qilishqa urun'ghan. Yene biride yette neper xitay jasusi birnechche yildin buyan nyu-york shehiride turuwatqan xitay puqraliqidiki bir kishini xitaygha qayturup élip kétish üchün toxtimastin tehdit sélish we parakendichilik peyda qilish bilen eyiblen'gen. Nyo jérséy shtatida pash bolghan üchinchi déloda bolsa töt neper xitay jasusi amérika tewelikidiki kishilerni xitay üchün ishleshke qiziqturmaqchi bolghan. Bu jeryanda ulardin üch kishining xitay istixbarat organlirining xadimi ikenliki pash bolghan.

Amérika edliye ministirliqining ministiri mérrik garland (Merrick Garland) bu heqte söz qilip “Bu délolardin shu nerse melum boldiki, xitay hökümiti amérika tupriqidiki heqlerni we erkinlikni we qanun sistémisini buzushqa urunup kéliwatidu. Emma ular meghlup boldi. Edliye ministirliqi bu xildiki buzghunchiliq qilmishigha hergizmu yol qoymaydu” dégen. Melum bolushiche, xitay hökümitining mushu xildiki jasusluq heriketliri yéqinqi mezgillerde köplep pash bolushqa bashlighan.