Bilinkén xitayning jasusluq hawa shari amérika hawa boshluqida bayqilishidin kéyin xitay ziyaritini kéchiktürdi

Muxbirimiz erkin
2023.02.03

Amérika tashqi ishlar ministiri blinkénning xitay ziyaritini bashlishigha 24 sa'et qalghan bir peytte, bir xitay jasusluq hawa sharining amérika hawa boshluqida bayqilishidin kéyin, 5-féwral bashlinidighan xitay ziyaritini kéchiktürgen. Roytérs agéntliqining xewer qilishiche, amérika emeldarliri xitay jasusluq hawa sharining amérika hawa boshluqida bayqilishi, amérikaning igilik hoquqigha “‍Éniq xilapliq qilish” herikiti, dep körsetken. Amérika tashqi ishlar ministirliqining yuqiri derijilik bir emeldari roytérs agéntliqigha qilghan sözide, “Biz her qaysi organlardiki xizmetdashlirimiz dölet mejlisi bilen meslihetleshkendin kéyin, hazirqi waqit ministir blinkénning xitaygha seper qilishining toghra waqti emeslikini qarar qilduq” dégen.

Bu emeldar yene xitay terepning “Epsuslan'ghanliqigha da'ir bayanati” gha diqqet qilghanliqini bildürüsh bilen bir waqitta, “Lékin bu hawa sharining hawa boshluqimizda peyda bolushi bizning igilik hoquqimizgha, shundaqla xelq'ara qanun'gha ochuq-ashkara xilapliq qilghanliq, bu ishning yüz bérishini qobul qilghili bolmaydu” dep körsetken. Roytérs agéntliqining bildürüshiche, xitay bir “Puqrawi” hawa sharining amérika asminigha uchup kirip qalghanliqidin epsuslanliqini éytqan. Bilinkénning ziyariti amérikadiki Uyghurlarning alahide diqqitini qozghighan. Ular ziyarette bilinkénning Uyghur irqiy qirghinchiliq mesilisini küntertipke qoyushi, amérikadiki Uyghurlarning tutqundiki a'ile ezalirini aqiwitini sürüshtürüshini telep qilghan.

Bilinkén 1-ayning axirlirida Uyghur, xongkong we tibet wekillirini özi ichige alghan bir guruppa pa'aliyetchi bilen körüshüp, ularning pikirini alghan. Arqidinla amérika tashqi ishlar ministirliqidiki diplomatlar a'ile ezasi xitayning türme-lagérlirida yétiwatqan amérikadiki bezi Uyghurlar bilen körüshkenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.