Кеңәш палата әзаси рубийо, хитайниң җасуслуқ һава шари арқилиқ америкаға сигнал бәргәнликини билдүргән

Хитайниң җасуслуқ һава шариниң америка һава бошлуқиға кирип, американиң истиратегийәлик ярдро қораллири орунлашқан районлардин учуп өтүшигә қарита америка дөләт мәҗлиси әзалири давамлиқ қаттиқ инкас билдүрмәктә. Америка кеңәш палатаси ‍истихбарат комитетиниң җумһурийәтчиләрдин болған мәсул ‍әзаси марку рубийониң көрситишичә, хитай америка һава бошлуқиға җасуслуқ һава шари әвәтиш арқилиқ, дуняға бир сигнал бәрмәкчи болған.

Маркур рубийо 5-феврал америка ABC телевизийә қанилиниң “бу һәптилик” программисиниң зияритини қобул қилғанда, “буниң ачқучлиқ тәрипи уларниң немә қиливатқанлиқини билиш, шундақла буниң арқисидики бәрмәкчи болған сигналидур” дегән.

Марко рубийо “һәммидин бәкрәк һава шариниң немиләрни көзәткәнликини билгүси барлиқи” ни ейтқан. Хитайниң җасуслиқ һава шари аляска вә канададин өтүп, өткән һәптә американиң монтана штатиға кәлгәндә, америка таратқулириға ашкарларлинип, америкада қаттиқ ғулғула қозғиған. Америка ташқий ишлар министири блинкен шу сәвәблик 5-феврал хитайда елип баридиған зияритини кечиктүргән иди. Марку рубийо: “улар һава шариниң байқилип қалидиғанлиқини, америка һөкүмитиниң буни ашкарилиши керәкликини, кишиләрниң бу шарни һава бошлуқида көридиғанлиқини билиду. Лекин улар бәрмәкчи болған сигнални ичидә билиду. Улар америка бир мәзглләрдә дәриҗидин ташқири күч болған болсиму, лекин һазир завалиққа йүз тутмақта, дегән сигнални бәрмәкчи болди” дегән.

Мәлум болушичә, һава шари 1-феврал күни монтана штатида байқалған болсиму, лекин һөкүмәт әмәлдарлири бу хәвәрни 2-феврал күни кәч мәзгилләрдә андин елан қилған.

Һава шари пәқәт 5-феврал шималий каролина штатиниң атлантик окян деңиз қирғиқиниң һава бошлуқида кәлгәндә андин етип чүшүрүлгән. Америка һәрбий даирилириниң ейтишичә, улар һава шарини етип чүшүрүштә аһалиләргә зиян-зәхмәт йәткүзүп қоймаслиқи үчүн, мувапиқ пурсәт күткән икән.