Kéngesh palata ezasi rubiyo, xitayning jasusluq hawa shari arqiliq amérikagha signal bergenlikini bildürgen

Xitayning jasusluq hawa sharining amérika hawa boshluqigha kirip, amérikaning istiratégiyelik yardro qoralliri orunlashqan rayonlardin uchup ötüshige qarita amérika dölet mejlisi ezaliri dawamliq qattiq inkas bildürmekte. Amérika kéngesh palatasi ‍istixbarat komitétining jumhuriyetchilerdin bolghan mes'ul ‍ezasi marku rubiyoning körsitishiche, xitay amérika hawa boshluqigha jasusluq hawa shari ewetish arqiliq, dunyagha bir signal bermekchi bolghan.

Markur rubiyo 5-féwral amérika ABC téléwiziye qanilining “Bu heptilik” programmisining ziyaritini qobul qilghanda, “Buning achquchliq teripi ularning néme qiliwatqanliqini bilish, shundaqla buning arqisidiki bermekchi bolghan signalidur” dégen.

Marko rubiyo “Hemmidin bekrek hawa sharining némilerni közetkenlikini bilgüsi barliqi” ni éytqan. Xitayning jasusliq hawa shari alyaska we kanadadin ötüp, ötken hepte amérikaning montana shtatigha kelgende, amérika taratqulirigha ashkarlarlinip, amérikada qattiq ghulghula qozghighan. Amérika tashqiy ishlar ministiri blinkén shu seweblik 5-féwral xitayda élip baridighan ziyaritini kéchiktürgen idi. Marku rubiyo: “Ular hawa sharining bayqilip qalidighanliqini, amérika hökümitining buni ashkarilishi kéreklikini, kishilerning bu sharni hawa boshluqida köridighanliqini bilidu. Lékin ular bermekchi bolghan signalni ichide bilidu. Ular amérika bir mezgllerde derijidin tashqiri küch bolghan bolsimu, lékin hazir zawaliqqa yüz tutmaqta, dégen signalni bermekchi boldi” dégen.

Melum bolushiche, hawa shari 1-féwral küni montana shtatida bayqalghan bolsimu, lékin hökümet emeldarliri bu xewerni 2-féwral küni kech mezgillerde andin élan qilghan.

Hawa shari peqet 5-féwral shimaliy karolina shtatining atlantik okyan déngiz qirghiqining hawa boshluqida kelgende andin étip chüshürülgen. Amérika herbiy da'irilirining éytishiche, ular hawa sharini étip chüshürüshte ahalilerge ziyan-zexmet yetküzüp qoymasliqi üchün, muwapiq purset kütken iken.