Gérmaniye hökümiti xitayning jasusluq qilmishliridin hoshyar bolushni agahlandurdi

“Blumbérg xewerliri” ning 30-awghusttiki xewiride éytilishiche, gérmaniye istixbarat da'iriliri hökümet xizmetchiliri we siyasiy sahediki kishilerni xitayning künséri éship bériwatqan jasusluq qilmishliridin hoshyar bolushqa chaqirghan.

Xewerde éytilishiche, xitay hökümitining gérmaniyediki jasusluq qilmishliri yéqinqi yillarda barghanséri ewj élishqa bashlighan. Buningda xitay kompartiyesi merkiziy komitéti qarmiqidiki “Xelq'ara bölüm” achquchluq rol oynaydighan bolup, gérmaniye qanuni boyiche herqandaq kishining bu bölümge alaqidar kishiler bilen alaqide bolushi men'iy qilinidu. 2023-Yili iyulda gérmaniye hökümiti élan qilghan bu heqtiki doklatta éytilishiche, gérmaniyede eng aktip jasusluq pa'aliyiti bilen shughulliniwatqan döletlerning biri xitay iken.

Xitay hökümiti izchil “Bölgünchi teshkilat” dep qarap kéliwatqan dunya Uyghur qurultiyining bash shitabi gérmaniyede bolup, yillardin buyan ularning qanunluq pa'aliyetliri xitay hökümitining türlük parakendichilik we paylaqchiliq obyékti bolup kéliwatqanidi. Emma xewerde bu qétimqi agahlandurushning bu xildiki pa'aliyetler bilen qanchilik alaqidar ikenliki tilgha élinmighan.

Melum bolushiche, gérmaniye rehbiri olaf shultiz (Olaf Scholz) gérmaniyening soda we iqtisad jehette xitaygha tayinip qélish weziyitini özgertishke küch chiqiriwatqan bolup, bu jeryanda herqaysi shirketlerni xitay bilen bolghan soda pa'aliyetliride yüksek hoshyar bolushqa dewet qilip kelmekte.