Béyjing saqchilirining 22 yashliq qizning ölümining heqiqi ehwalini yoshuruwatqanliqi ilgiri sürüldi

Muxbirimiz irade
2013-05-09
Share

Peyshenbe küni nurghunlighan saqchi béyjingning jenubidiki jingwen kiyim - kéchek bazirining kirish éghizi we etrapidiki kochilarni muhasirige alghan.

Igilinishiche, bu, saqchilarning jingwen bazirida charshenbe küni yüz bergen namayishning dawam qilishini tosash üchün alghan tedbiri iken.

Radi'omiz xitayche bölümi igiligen uchurdin qarighanda, enxuydin kélip béyjingda ishlemchilik qiliwatqan 22 yashliq bir qiz aldinqi küni ölük halda bayqalghan. Saqchilar u qizning özini binadin étip ölüwalghanliqini bildürgen. Emma qizning ata - anisi we inérnétte inkas bildürgüchiler saqchilarning jawabining qana'etlinerlik emeslikini, bu qizning ölüwalmighanliqini, eksiche bir guruppa kishining basqunchiliqigha uchrap öltürülgenlikini ilgiri sürgen.

Netijide, charshenbe küni jingwen baziri etrapidiki aqqun ishchilar saqchilargha naraziliq bildürüp namayish qilghan. Qoralliq, qoralsiz 100 din artuq saqchi bir tik ucharning nazaritide namayishchilarni tarqitiwetmekchi bolghan. Netijide ikki terep arisida tirkishish kélip chiqqan.

Fransiye agéntliqining éytishiche, qizning ata - anisi saqchilar délo heqqidiki pakitlarni yoshuruwatidu dep qaraydiken. Uning üstige saqchilarning namayishchilarning bir qismini qolgha élishi we ularni jimiqturushqa urunushi kishilerning bu heqtiki gumanlirini téximu kücheytiwetken. Bezi aqqun ishchilar muxbirgha söz qilip, saqchilarning bu ishqa nahayiti gumanliq mu'amile qiliwatqanliqini, ularning her da'im aqqun ishchilargha yerliklerdin perqliq mu'amile qilidighanliqini shikayet qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.