Qazaqistanda ötküzülgen“Xitay kino heptiliki” pa'aliyitige Uyghur filimliri qatnashturuldi

Xitay rusiye, qazaqistan, qirghizistan, özbékistan qatarliq memliketler bilen hemkarlishish astida bashlighan “Yipek yoli iqtisadiy belwéqi” layihisini janlandurush üchün medeniyet pa'aliyetlirinimu kücheytishke kirishken bolup, buning üchün Uyghur medeniyiti témisinimu ottura asiya döletliri bilen bolghan bu xil alaqe da'irisige kirgüzmekte.

Melum bolushiche, yéqinda qazaqistanda ene shu“Yipek yoli” hemkarliqi ramkisi astida mexsus xitay kino heptiliki pa'aliyiti ötküzülgen bolup, mezkur pa'aliyette Uyghur éli témisigha a'it bir qanche filimlermu körsitilgen. Buning ichide tonulghan Uyghur kino rézhissori shirzat yaqup ishligen “Méhri-shepqet” filimimu körsitilgen.

Qazaqistan metbu'atlirining uchurliridin melum bolushiche, rézhissor shirzat yaqup we “Méhri shepqet” filimida rol alghan xadimlardin bir qanche nepiri xitay wekiller ömiki terkibide qazaqistanni ziyaret qilishqa ewetilgen.

Qazaqistandiki Uyghur analizchilirining éytishiche, yéqinqi yillardin buyan xitayning Uyghur élidiki siyasiy teqibleshliri, milliy ziddiyetler we Uyghur tili hem ma'aripigha qarita élip bériliwatqan xitaylashturush siyasiti we bashqilargha a'it uchurlar hem inkaslar xelq'arada, jümlidin ottura asiya memliketliridimu inkas qozghashqa bashlidi. Shu sewebtin, béyjing Uyghurlar köp olturaqlashqan qazaqistan qatarliq ottura asiya memliketlirige we bashqa ellerge Uyghur medeniyitining tereqqiy qiliwatqanliqi we Uyghurlarning bextiyar yashawatqanliqidin ibaret teshwiqatlirini qanat yaydurushqa tirishmaqta.