Xitayda iqtisadiy krizis yüz berse, amérika tarixida yüz bergen iqtisadiy krizistin éship chüshidiken

“Forbés” zhurnili 22-yanwar küni élan qilghan bir maqalide, xitay iqtisadida alliqachan chong krizis alametlirining körülüshke bashlighanliqi, bu krizisning amérika 1930-yil duch kelgen iqtisadiy bohran'gha oxshiship kétidighanliqi körsitilgen.

Maqalide éytilishiche, gerche xitayda pay chéki baziri téxi weyran bolmighan bolsimu, iqtisadiy qurulma we kelgüsige bolghan ishenchning yoqilishi ötmüshtiki amérikani eslitidiken. 1930-Yil amérikada yüz bergen iqtisadiy krizis amérikaliqlarning ishenchini yoqatqan bolsa, bügünki künde xitay ahalisi shi jinpingning ömürlük hoquq tutushidin we xata siyaset yürgüzüshidin ümidsizlen'gen bolup, iqtisadni güllendüridighan ishenchini yoqatmaqta iken.

Xitay xelq bankisi ötken yil ösümni töwenlitip, bazargha we pul-mu'amile organlirigha nurghun pul tarqatqan bolup, pul bilen teminlesh miqdari 9.7 Pirsent ashqan. Emma uningdin héchqandaq payda körülmigen, belki xitay puli paxallishishqa bashlighan. Xitaydiki asasliq mesile pay chékining weyran bolushi emes, belki shi jinpingning siyasiti iken. Shi jinping xususiy karxanichilarning ishenchini töwenlitiwetken.

Maqalide körsitilishiche, eger shi jinping we uning emeldarliri xitayning nöwettiki iqtisadiy krizisini tonup yétip, jiddiy islahat élip barmisa, xitayda yüz béridighan iqtisadiy bohran ötken esirde amérikada yüz bergen iqtisadiy kirizistinmu chong we éghir bolidiken. Amérika öz waqtida bir qanche yil ichidila iqtisadiy krizistin qutulup chiqalighan, chünki uning siyasiy tüzülme ewzelliki bar idi. Emma xitayning bir partiyelik siyasiy tüzülmisige béqinidighan iqtisadi asanliqche eslige kélelmeydiken.