Közetküchiler xitay axbaratining Uyghur rayonidiki xitay köchmenlirini righbetlendürüwatqanliqini ilgiri sürdi

Bügün xitayning sina xewer torida shayar nahiyisidiki bir xitay köchmenning yerlik ahaliler bilen bolghan munasiwiti heqqide bir parche xewer bérildi. Xewerde 61 yashliq wang jyéshu'ang isimlik bir xitayning Uyghur rayonigha 3 yash waqtida gensudin köchüp kelgenliki, shuningdin béri Uyghurlar bilen öz'ara hemkarliship inaq yashap kéliwatqanliqi toghriliq tepsilatlar bérilgen.

Xewerde déyilishiche, wang jyéshu'ang özining Uyghur diyarigha könüp ketkenliki heqqide tesirat bayan qilip, “Méning yiltizim shinjangda, eger méni biri bu yerdin ket dése hergizmu ketmeymen” dep jawab bergen. Bu xewer heqqide radiyomizgha pikir bayan qilghan washin'gtonda yashawatqan siyasiy közetküchi memet sulayman ependi xewerning chinliqigha qarita gumanini bayan qilish bilen birlikte eger xewer rast bolghan teqdirdimu, wangning bayanliridin uningdiki köchmenlik héssiyatini we özi yaki a'ilisining kelgüsi teqdiridin endishe ichide ikenlikini körüwélishqa bolidighanliqini bayan qildi. 

Memet sulayman ependi yene Uyghur rayonidiki siyasiy weziyetning jiddiyliki sewebidin rayonda yashawatqan xitay köchmenlirining endishige chüshkenlikini, shunga xitay axbaratining bu xil xewerler arqiliq Uyghur rayonigha qarita xitay köchmenlirini köchüsh we yerlishishke righbetlendürüwatqanliqini ilgiri sürdi.