Xitay qeshqer iqtisadiy tereqqiyat rayonini teshwiq qilip köchmenlerni jelp qilishqa urunmaqta

Muxbirimiz irade
2020-10-15
Élxet
Pikir
Share
Print

Xitayche chiqidighan "Tengritagh" xewerler tori 15-öktebir künidiki bir xewiride, qeshqerge sélin'ghan tereqqiyat rayonining qeshqerning iqtisadiy tereqqiyatigha zor töhpe qoshuwatqanliqini ilgiri sürgen.

"Qeshqer iqtisadiy tereqqiyat rayoni dölet ichi we sirtidiki karxanilardin meblegh jelp qilidighan qiziq nuqtisigha aylandi" mawzusida élan qilin'ghan xewerde munular déyilgen: "2010-Yili merkizi hökümet qeshqer iqtisadiy tereqqiyat rayoni qurushni testiqlap, qeshqerni xitayning gherbke échiwétishidiki muhim köznekke aylandurdi. 10 Yildin kéyin, qeshqer iqtisadiy tereqqiyat rayoni qaqasliqtin tereqqiy qilip, ul esliheliri toluq we ewzel iqtisadiy rayon'gha aylandi. 2600 Din artuq karxana baghchigha orunlashti, dölet ichi we sirtidiki shirketlerning meblighini jelp qilidighan qiziq nuqtigha aylandi."

Xewerde yene "Qeshqerge meblegh salghan her bir karxanining özige xas muddi'asi bar. Beziler bu yerdiki quruq bazargha hewes qildi, beziliri orun ewzellikidin paydilinip, etraptiki chet'el bazarlirigha kirishni ümid qildi, beziliri shinjanggha sana'et yardimi bérish wezipisini üstige aldi. Ular ajizliqtin küchlüklükke qarap tereqqiyatning hékayisini yazidu," dégenler bayan qilin'ghan.

Halbuki, xelq'araliq axbaratlarning muxbirliri ilgiri qeshqer iqtisadiy rayoni heqqide yazghan xewerliride qeshqerdiki iqtisadiy tereqqiyat rayonining xitay ilgiri sürgendek haletni shekillendürelmigenlikini, nurghun dukanlarning taqaqliqini, bazarlarning chölderep tashlinip qalghanliqini, etraptiki qoshna döletlerdin kéliwatqanlarning erzan bahaliq ushshaq-chüshshek mallarni sétiwalghili kélidighanliqini xewer qilip, atalmish qeshqer tereqqiyat rayoninining meblegh israpchiliqi bolghanliqini xewer qilghan idi.

Chet'ellerdiki közetküchiler, xitay da'irilining qeshqer iqtisadiy tereqqiyat rayonining atalmish ewzelliklirini bazargha sélish arqiliq ichkiri ölkilerdin xitaylarni rayon'gha kélishke jelp qilishni közlewatqanliqini mölcherlimekte.

Toluq bet