Xitay hökümitining Uyghur ma'aripini xitaylashturush pilani qedem-basquchlar boyiche jiddiy dawam qiliwatqanliqi melum bolmaqta.
Maralbéshi nahiyilik hökümet toridin melum bolushiche, maralbéshi nahiyilik da'iriler 2-ayning 28-küni jiddiy uqturush chiqirip, pütün xitay miqyasidin 1850 neper oqutquchi, 200 neper xizmetchi xadim qobul qilidighanliqini bildürgen.
Uqturushta xitay ölkiliridin qobul qilin'ghan oqutquchi we xizmetchi xadimlargha ayda 6800 yüendin 7300 yüen'giche ma'ash bérilidighanliqi, uningdin sirt ularning heqsiz turalghu, qoshumche yardem puli, qatnash puli, 13-ayliq ma'ash, su, tok we öylirining xojiliq bashqurush heqqidin behrimen bolidighanliqi alahide eskertilgen.
Közetküchiler, xitay ölkiliridin qobul qilinidighan yuqiri ma'ash we alahide teminatliq xitay oqutquchilar bilen töwen ma'ashliq yerlik Uyghur oqutquchilarni sélishturghanda iqtisadiy menpe'et jehettin asman-zémin perqning mewjutluqini tekitlimekte.
Uqturushtin melum bolushiche, xitay ölkiliridin qobul qilinidighan yuqiriqi 2 mingdin artuq xitay oqutquchi we xizmetchi xadim maralbéshi nahiyisining herqaysi ottura-bashlan'ghuch mekteplirige teqsim qilinidiken.
Uqturushta yene xitayning gensu, shenshi, xénen, sichüen, guyju, xunen, jyangshi qatarliq nechche onlighan ölkiliride maralbéshi nahiyisige oqutquchi qobul qilidighan xizmet nuqtilirining qurulghanliqi eskertilgen.
Muhajirettiki közetküchiler bilen siyasiy analizchilar, xitay hökümitining yéqindin buyan xitay ölkiliridin Uyghur diyarining jenubidiki wilayet we nahiyilerge zor türkümde oqutquchi we xizmetchi xadim yötkewatqanliqidin qattiq endishilenmekte.
