Xitay kompartiyesining 20-nöwetlik 3-omumiy yighini xitay iqtisadida burulush peyda qilalmaydu dep qaralmaqta
2024.07.16
Xitay kompartiyesining 20-nöwetlik 3-omumiy yighini 7-ayning 15-künidin bashlap échiliwatqan bolup, yighinda xitaydiki öy-mülük kirizisi, yashlarning yuqiri nisbettiki ishsizliqi, karxanilar we istémalchilardiki ümidsizlik, yerlik hökümetning téximu köp qerzge boghulup qélishi qatarliq mesililerni hel qilish muzakire qilinidiken. Emma közetküchiler bu yighin xitayning nöwettiki iqtisadiy ehwalini chong jehettin özgertelishi natayin dep qarimaqta iken.
“Amérika awazi” torining 16-iyul bergen xewirige qarighanda, xitaydiki iqtisadiy mesililer xelq'ara soda muhitidiki özgirishler, bolupmu xitayning amérika bashchiliqidiki démokratik döletler bilen ziddiyitining küchiyishige egiship téximu éghirlishiwatqan bolup, xelq'ara jem'iyetmu xitayning bu yighinda “Xitaygha chet el meblighini köplep meblegh jelp qilish” dégendek islahat chaqiriqlirini otturigha qoyushidin ümid kütmeydiken. Tehlilchilerning bildürüshiche, xitay özining islahatini 90-yillarda tamamlap bolghan bolup, xitayning nöwettiki wezipisi shu islahat netijilirini mustehkemlesh iken.
Xewerde éytilishiche, xitay kompartiyesining bash sékrétari shi jinpingning “Partiye hemmini bashqurush, pul-mu'amile xetirini tügitish, téxnikida öz küchige tayinish we meblegh sélishni asas qilghan kesiplerni tereqqiy qildurush” dégendek siyasetliri xitay üchün bir mezgil ishqa yarisimu, xitay iqtisadining téz sür'ette janlinishi we tereqqiy qilishigha türtke bolalmaydiken. Xitay iqtisadining heqiqiy güllinishi yenila xitayning gherb döletliri bilen bolghan soda we téxnika hemkarliqigha baghliq bolup, nöwette xitayning iqtisad bilen teng herbiy küchini ashurup, gherb döletlirige tehdit shekillendürüshi xitay iqtisadigha paydisiz muhit yaratqan.
Bu yighin xitayning chöküwatqan iqtisadini qandaq qutquzidighanliqini, qandaq islahat élip baridighanliqini körsitip béridighan yighin dep qaralsimu, nöwettiki ehwaldin qarighanda xitay xelq'ara jem'iyetke héchqandaq paydiliq bir signal bermigen.