Amérika hökümiti xitayning xiyustondiki konsulxanisini 72 sa'et ichide taqashqa buyrudi

Muxbirimiz nur'iman
2020-07-22
Élxet
Pikir
Share
Print

"Nyu-york waqti" gézitining 22-iyul bergen xewirige asaslan'ghanda amérika hökümiti xitayning xiyustondiki bash konsulxanisini jasusluq qilish we eqliy mülük oghrilashqa urun'ghanliqi seweblik 72-sa'et ichide taqashqa buyrughan.

Amérika tashqi ishlar ministiri mayk pompéyo 22-iyul daniyening kopénhagén shehiride ötküzülgen muxbirlarni kütüwélish yighinida bu heqte mundaq dédi: "Xitay puqralirining amérikada eqliy mülük hoquqini oghrilishi izchil mesile bolup keldi. Biz xitay kompartiyesige purset berduq. Ular herikitini toxtatmidi. Biz emdi amérika puqralirini, dölet bixeterlikimizni we iqtisadimizni qoghdaydighan heriketke ötimiz".

Amérika tashqi ishlar ministirliqimu bu heqte mexsus bayanat bergen bolup, bayanatta mundaq déyilgen: "Bu qétimliq taqash xitayning amérikaning igilik hoquqigha qayta-qayta xilapliq qilghanliqigha, yeni uning 'izchil jasusluq we tesir körsitish herikiti'ge qayturulghan jawab".

Amérika tashqi ishlar ministirliqi bayanatchisi morgan ortagus amérikaning chiqarghan bu qararining xelq'ara qanun'gha uyghun ikenlikini tekitlep mundaq dédi: "Wyéna ehdinamiside diplomatlarning 'qobul qilghuchi döletning qanun-nizamlirigha hörmet qilish we u döletning ichki ishlirigha arilashmasliq mejburiyiti bar' déyilgen. Lékin xitay izchil jasusluq qilish we amérikaning siyasetlirige tesir körsitishke urunup keldi. Tashqi ishlar ministiri pompéyo, fédératsiye tekshürüsh idarisining bashliqi wray we bash teptish barr éytqandek, xitay emeldarliri dölitimizning siyasitige arilashti, amérikaning eqliy mülük hoquqini oghrilidi, xitayda yashaydighan xitay amérikaliqlarning a'ile-tawabi'atlirigha tehdit saldi. Shunga amérika hökümiti xitayning xiyustondiki bash konsulxanisini taqash buyruqini berdi".

Yéqinda amérika hökümitining xitay kompartiyesi ezaliri we ularning a'ile-tawabi'atlirining amérikagha kirishini chekleshni oylishiwatqanliqi otturigha chiqqanidi.

Toluq bet