Хитай хәлқаралиқ мунасивәттә көпләп уттурушқа башлиди

Мухбиримиз әзиз
2020-10-13
Share

Йеқинқи мәзгилләрдә барғансери әвҗ елишқа башлиған хитай һәққидики бәс-муназириләр изчил уйғурлар мәсилисини чөридигән һалда юқири пәллигә чиқишқа башлиди. Болупму хитай һөкүмитиниң белгийәдә турушлуқ баш әлчиси сав җоңмиң тивиттерда «уйғурлардәк бәхтлик хәлқла мушундақ шадиманлиқ ичидә уссул ойниялайду» дәп учур йоллиғандин кейин, уйғурларниң «милтиқ сайисидики уссули» әмәлийәттә хитай һөкүмитиниң абруйини техиму чүшүргән.

«Дөләт мәнпәәти» гезитиниң 13-өктәбирдики саниға бесилған елизабет брав имзасидики мақалидә мушу мәсилини йип учи қилған һалда хитай һөкүмитиниң нөвәттә хәлқаралиқ мунасивәттә барғансери сәлбийликниң образи болуп қеливатқанлиқи муһакимә қилинди.

Мақалидә көрситилишичә, иккинчи дуня уруши мәзгилидиму натсстлар германийәси йәһудийлар қамалған лагерлардин тутқунларниң қанчилик шадиманлиқ ичидә музикидин зоқ еливатқанлиқи һәққидики сүрәтлик хәвәрләрни көпләп йоллиған икән. Хитай һөкүмитиниң бу хилдики көзини парқиритип туруп ялған сөзләйдиған ишлири бу қетимқи таҗсиман вирусида йәнә бир қетим дуняға ашкара болған болсиму, улар тездин «вирус америкадин бизгә тарқалған болуши мумкин,» дәп җакарлиған.

Апторниң баян қилишичә, ашу хилдики сахтипәзлик вә номуссизларчә ялған учур тарқитиш қилмиши түпәйлидин, ғәрб дөләтлириниң хитайдин сәскиниш туйғусини синаш райи буниң бирдәк 70 яки 80 пирсәнттин юқири болғанлиқини көрсәтмәктә икән. Хитай билән иқтисадий алақиси бәк қоюқ болған италийәликләр арисидиму бу нисбәтниң 62 пирсәнт икәнлики мәлум болған. Болупму хитай һөкүмитиниң пүтүн дуня көрүп турған әһвалда милйонларчә уйғурни лагерға қамаш, әқлий мүлүк оғрилиқидин қол үзмәслик, хәлқниң көңүл ечиш васитиси болған һолливуд дунясиғичә сүзгүч селиш дегәндәк бир қатар қилмишлири билән дуняни алдимақчи болуши, униң хәлқараниң нәзиридин чүшүп кетишидики асаслиқ сәвәбләр икән.

Мәлум болушичә, йеқинда өткүзүлгән бирләшкән дөләтләр тәшкилатидики кишилик һоқуқ мәсилилири йиғинидиму дуня җамаити уйғурларни қоллаш вә хитайни әйибләш темисида иккигә бөлүнгән. Буниңда уйғурларни қоллайдиған дөләтләрниң сани ешип, хитай һөкүмитини һимайә қилидиған дөләтләр саниниң азийип меңишиму дәл мушу хил сәскинишниң нәтиҗиси, дәп қаралмақта икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.