Xitaylarning amérika tewesidiki “Küntaxta uwisi” pachaqlap tashlandi

Roytérs agéntliqining 10-maydiki xewiride éytilishiche, amérika saqchi da'iriliri kaliforniye we filorida shitatliridiki xitaylar mangduruwatqan küntaxta zawutlirini tuyuqsiz tintip, ularning zawut we ishxanilirini péchetligen.

Xewerde éytilishiche, xitayning “Jinko küntaxta shirkiti” ning bash shitabi shangxey shehiride bolup, amérika tewesidiki bu zawutliri amérika fédératsiye tekshürüsh idarisining axturush buyruqi boyiche axturulghan. Amérika ana weten xewpsizlik ministirliqi bu qétimqi axturushning sewebini hazirche ashkarilimighan. Mezkur shirket bolsa dunyadiki küntaxta ishlepchiqirishta mehsulat miqdari eng köp bolghan zawutlarning biri iken. Emma shirketning bayanatchisi bu heqte muxbirlargha söz qilip: “Biz exlaq pirinsiplirigha we amérika qanunlirigha toluq ri'aye qilghan asasta ish körüp kéliwatimiz” dep turuwalghan.

“Filorida xewerliri” ning bu heqtiki xewiride éytilishiche, amérika soda ministirliqi “Jinko” shirkitining öz mehsulatlirini awwal bashqa bir memliketke ewetip, shu jaydin amérika tewesige élip kiriwatqanliqini bildürgen. Emma dunyadiki küntaxta mehsulatlirining mutleq köp qismi xitaydin kélidighanliqi, xitay temin étiwatqan hemde ghayet zor japaliq jismaniy emgek bedilige pütüp chiqiwatqan bu küntaxta mehsulatlirining asasiy jehettin Uyghur diyaridiki mejburiy emgekning mehsuli ikenliki birnechche yildin buyan herqaysi sahening zor diqqitini qozghap kelgen idi.

“Forbés” torining bu heqtiki xewiride éytilishiche, washin'gton shehiridiki Uyghur kishilik hoquq qurulushi mexsus bayanat élan qilip, amérika prézidénti jow baydénning “Asiya tewesidin küntaxta import qilishqa waqtinche chek qoymasliq” heqqidiki belgilimisini bikar qilishni telep qilghan.