En ren texellusidiki tunggan sha'ir shüy xawshin yéqinda xitay bixeterlik xadimlirining parakendichilikige uchrighan. Bir qisim insan heqliri teshkilatliri buni "Xitay hökümiti Uyghurlarning zor kölemlik tutqun qilinish ehwali heqqide söz qilmaqchi bolghan en renning éghizini étish herikiti" dep izahlighan.
Melum bolushiche, 16-awghust küni xitay bixeterlik xadimliri uning öyige kelgen we en ren'ge torlargha qalaymiqan nersilerni chaplimasliq heqqide agahlandurush bergen. "Qalaymiqan nersiler" déyilgenler uning Uyghurlargha munasiwetlik tutqun we yighiwélish lagérliri heqqidiki tor yazmilirini körsitidiken.
Amérika qelemkeshler jem'iyiti buningdin xewerdar bolghandin kéyin buninggha inkas qayturup: "Xitay da'iriliri en rendek bir sha'ir insan heqliri mesilisini otturigha qoyghanda uninggha tehdit sélishning ornigha uning gépige qulaq sélishi lazim idi" dégen.
En ren radiyomiz xitay bölümining ziyaritini qobul qilghanda: "Méning bu mesililerni qayta-qayta tilgha élishimdiki seweb shuki, shinjangda hazir zor kölemlik tutqun dawam qiliwatidu. Eger buninggha perwasiz mu'amile qiliniwerse, buning aqiwiti bekmu yaman bolidu. Shunga meyli néme körsem kördüm, ishqilip axirqi tiniqim qalghuche Uyghurlar üchün sözleymen" dégen.
U ziyaret jeryanida yighiwélish lagérlirining Uyghurlarni, ularning medeniyet we diniy étiqadini nishan qiliwatqanliqini bayan qilip, bu ehwalning gitlér gérmaniyesi dewridiki paji'ege bekmu oxshaydighanliqini tekitligen.
