Хитай маарип министири мәхсус қәшқәр қатарлиқ җайлардики маарип әһвалини тәкшүрди

Мухбиримиз үмидвар
2017-06-18
Share

Хитай дөләтлик маарип министирлиқи башлиқи мәхсус қәшқәр қатарлиқ җайларниң маарип саһәсидә тәкшүрүш елип барған болуп, 16- 17-июн күнлири хитай маарип министири чен бавшең башчилиқидики бир өмәк қәшқәр шәһиригә җайлашқан қәшқәр университети, дөләт бағ йәслиси вә башқа җайларда зиярәттә болуп, сөһбәт йиғинлири өткүзгән.

Хитай һөкүмәт хәвәрлиридин мәлум болушичә, чен бавшең башчилиқидики мәзкур өмәкниң вәзиписи уйғур дияридики алий мәктәпләрдики сиясий идийә хизмәтлири, қош тиллиқ маарип әһвали шуниңдәк уйғур дияридики маарип ислаһат әһвалини тәкшүрүштин ибарәт.

Хитай маарип министири чен бавшең башчилиқидики хитай мәркизи һөкүмитиниң мәзкур тәкшүрүп тәтқиқ қилиш өмики уйғур аптоном районлуқ парткомниң маарип хизмәтлиригә мәсул муавин секретари или пеңшин қатарлиқларниң доклатини аңлиған.

Тәңритағ ториниң хәвиридә илгири сүрүлүшичә, хитай маарип министири чен бавшең сөзидә уйғур аптоном райони даирилирини "маарипни иҗтимаий муқимлиқ вә әбәдий әминликни қоғдашниң әң асаслиқ вә әң муһим чарә-тәдбири" қилғанлиқини муәййәнләштүргән. Әмма, уйғур аптоном районлуқ парткоминиң муавин секретари или пеңшин өзлириниң уйғур районида йүргүзүватқан маарип сияситини, дөләт рәиси ши җинпиңниң "шинҗаңниң м муқимлиқини қоғдап, әбәдий әминликни әмәлгә ашуруштики түгүн адәмдә, ачқуч маарипта" дегән йолйоруқи асасида йүргүзгәнликини ейтқан.

Хәвәр васитилиридин мәлумки, йеқинқи вақитлардин буян хитай мәркизи һөкүмити алий мәктәпләрдики идийиви-сиясий хизмәтни күчәйтиватқан болуп, уйғур дияридики алий мәктәпләрни өз ичигә алған маарип саһәсидики сиясий идийиви хизмәт аталмиш "үч хил күчләр" гә қарши күрәш қилишқа қаритилған иди. Анализчиларниң қаришичә, уйғур райони партком даирилири нөвәттә хитайниң асасий қануни вә миллий территорийилик аптономийә қануни қатарлиқ қанунлиридики миллий тил вә миллий маарип һоқуқлирини бир чәткә қайрип қоюп, уйғур аптоном райониниң асаси миллити - уйғурларниң вә башқа милләтләрниң узун йиллардин буян давамлаштуруп келиватқан миллий маарипини хитайчилаштуруш қәдимини тезләтмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт