Xitayda chet el meblighining éqip kétishi rékort yaratmaqta

“Blumbérg xewerliri” ning 17-dékabirdiki xewiride éytilishiche, yillardin buyan xitaygha meblegh qilip sélin'ghan chet el kapitalining xitaydin éqip chiqip kétishi noyabirda tarixtiki eng yuqiri rékortni yaratqan. Xitay bankiliri ötken bir ay ichide 45 milyard amérika dolliridin köprek kapitalni xéridarlarning telipi boyiche ularning xitay sirtidiki banka hésabatlirigha yötkep bergen. Bu san öktebir éyida 25 milyard dollar bolghan iken.

Xewerde éytilishiche, chet el meblighining bundaq zor kölemde xitaydin éqip kétishide yéngi nöwetlik hökümet pirézidénti donald trampning xitaydin kélidighan tawarlargha 60 pirsent tamozhna béji qoymaqchi bolushi hel qilghuch rol oynighan amil hésablinidiken. Mizuxo bankisidiki asiya iqtisadi mutexessisi kén chong (Ken Cheung) bu heqte toxtilip, “Amérika hökümitining tamozhna béji qoymaqchi bolushi we ösüm nisbitidiki perqler bu xil yüzlinishke ot yaqti. Dollarning artuqchiliqi bolsa buningdiki yene bir seweb” dégen.

Meblegh salghuchilar eng köp meslihet alidighan “Finimayiz” (Finimize) torining bu heqtiki xewiride éytilishiche, xitay pulining amérika dolliri bilen ayriwashlash qimmiti dawamliq töwenlewatqan bolup, bu hal yene bir yaqtin xitay iqtisadidiki chöküshning eng janliq ispati hésablinidiken. Xitaydiki pay chéki bazirining töwenlishi, xelq pulining kursi chüshüshi, chet el meblighining éqip kétishi dégenler xitay hökümiti ijra qiliwatqan iqtisadni janlandurush tedbirlirining kargha kelmeywatqanliqini, shuningdek xitaydiki töwen istémalda körünerlik yaxshilinishning bolmighanliqini körsitidu, dep qaralmaqta.