12-Нөвәтлик аяллар қурултийида хитайниң сиясий “баш нишани” алаһидә тәкитләнди

Мухбиримиз әзиз
2022.06.15
Share on WhatsApp
Share on WhatsApp

Уйғур аптоном районлуқ 12-нөвәтлик аяллар қурултийи 13-июн күни үрүмчи шәһиридә чақирилған. Йиғинға бейҗиң вә үрүмчидики юқири дәриҗилик компартийә әмәлдарлири қатнашқан болуп, йиғинда бир қатар йеңи сиясий вәзипиләр оттуриға қоюлған.

Хитай һөкүмити башқурушидики “тәңритағ тори” ниң 14-июндики хәвиридә ейтилишичә, хитай мәмликәтлик аяллар бирләшмиси партгурупписиниң секретари хуаң шяввей бу қетимлиқ қурултайда алаһидә сөз қилған. У сөзидә: “шинҗаңдики аяллар хизмити һазир тарихий бурулуш басқучида туруватиду. Буниңдин кейинки аяллар хизмитидә баш секретар ши җинпиңниң шинҗаң хизмити һәққидики муһим йолйоруқлирини толуқ изчиллаштуруш һәмдә ши йеңи дәврдики шинҗаңни идарә қилиш истратегийәсини иҗра қилиш муһим нуқта болуши лазим” дәп көрсәткән. Шуниң билән биргә аяллар дуняси үчүн “партийәдин миннәтдар болуш, партийәниң сөзини аңлаш вә партийәгә әгишип меңишниң муһимлиқини, бу җәрянда җуңхуа ортақ гәвдиси тонушини ашуруп, шинҗаңниң муқимлиқи вә әминлики үчүн төһпә қошқили болидиғанлиқи” ни алаһидә тәкитлигән.

Уйғур аптоном районлуқ парткомниң секретари ма шиңруйму мушу мәзмундики сөзләрни қилған һәмдә аялларни бу җәһәттә йеңи төһпә қошушқа чақирған. Йиғинда айнур мәқсәт уйғур аптоном районлуқ аяллар бирләшмисиниң рәиси болуп “сайланған”.

Йеқинқи мәзгилләрдә көпләп мәлум болуватқан түрлүк һөҗҗәтләр вә архиплар хитай һөкүмитиниң уйғур дияридики қирғинчилиқ қилмишида аяллар вә балиларниңму нишан қилиниватқанлиқини көрситип бәргәниди.

Нопус чәкләш үчүн уйғур аяллирини туғмас қилиш, анилар, яш қизларни көпләп лагерларға солаш, түрмиләргә мәһкум қилиш, балиларни анилиридин айриветиш қатарлиқ қилмишлар хәлқара җәмийәтниң әйиблишигә учриғаниди. Йеқинда паш болған “шинҗаң сақчи һөҗҗәтлири” диму тутқун қилинған мәһбусларниң ичидә көпсанда яш қизлар, чоң яштики аниларниң барлиқи ашкариланғаниди.

Йеқинқи мәзгилләрдә паш болған бир қисим һөкүмәт һөҗҗәтлири болса “җуңхуа ортақ гәвдиси чүшәнчиси” вә “йеңи дәврдики шинҗаңни идарә қилиш истратегийәси” дегәнләрниң уйғурларни хитайлаштуруш вә уйғур диярини үзүл-кесил хитай өлкисигә айландуруш икәнликини намаян қилип бәрди. Аяллар қурултийида бу сиясий нишанларниң буниңдин кейинки аяллар хизмитиниң муһим нуқтиси болидиғанлиқини җакарлаш нөвәттики қирғинчилиқ сияситиниң аялларни васитә қилған һалда техиму юқири сәвийәгә йетидиғанлиқиниң бешарити, дәп қаралмақта икән.

Көп көрүлгән хәвәрләр
Қисқа хәвәрләр
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.