12-Nöwetlik ayallar qurultiyida xitayning siyasiy “Bash nishani” alahide tekitlendi

Muxbirimiz eziz
2022.06.15
Share on WhatsApp
Share on WhatsApp

Uyghur aptonom rayonluq 12-nöwetlik ayallar qurultiyi 13-iyun küni ürümchi shehiride chaqirilghan. Yighin'gha béyjing we ürümchidiki yuqiri derijilik kompartiye emeldarliri qatnashqan bolup, yighinda bir qatar yéngi siyasiy wezipiler otturigha qoyulghan.

Xitay hökümiti bashqurushidiki “Tengritagh tori” ning 14-iyundiki xewiride éytilishiche, xitay memliketlik ayallar birleshmisi partguruppisining sékrétari xu'ang shyawwéy bu qétimliq qurultayda alahide söz qilghan. U sözide: “Shinjangdiki ayallar xizmiti hazir tarixiy burulush basquchida turuwatidu. Buningdin kéyinki ayallar xizmitide bash sékrétar shi jinpingning shinjang xizmiti heqqidiki muhim yolyoruqlirini toluq izchillashturush hemde shi yéngi dewrdiki shinjangni idare qilish istratégiyesini ijra qilish muhim nuqta bolushi lazim” dep körsetken. Shuning bilen birge ayallar dunyasi üchün “Partiyedin minnetdar bolush, partiyening sözini anglash we partiyege egiship méngishning muhimliqini, bu jeryanda jungxu'a ortaq gewdisi tonushini ashurup, shinjangning muqimliqi we eminliki üchün töhpe qoshqili bolidighanliqi” ni alahide tekitligen.

Uyghur aptonom rayonluq partkomning sékrétari ma shingruymu mushu mezmundiki sözlerni qilghan hemde ayallarni bu jehette yéngi töhpe qoshushqa chaqirghan. Yighinda aynur meqset Uyghur aptonom rayonluq ayallar birleshmisining re'isi bolup “Saylan'ghan”.

Yéqinqi mezgillerde köplep melum boluwatqan türlük höjjetler we arxiplar xitay hökümitining Uyghur diyaridiki qirghinchiliq qilmishida ayallar we balilarningmu nishan qiliniwatqanliqini körsitip bergenidi.

Nopus cheklesh üchün Uyghur ayallirini tughmas qilish, anilar, yash qizlarni köplep lagérlargha solash, türmilerge mehkum qilish, balilarni aniliridin ayriwétish qatarliq qilmishlar xelq'ara jem'iyetning eyiblishige uchrighanidi. Yéqinda pash bolghan “Shinjang saqchi höjjetliri” dimu tutqun qilin'ghan mehbuslarning ichide köpsanda yash qizlar, chong yashtiki anilarning barliqi ashkarilan'ghanidi.

Yéqinqi mezgillerde pash bolghan bir qisim hökümet höjjetliri bolsa “Jungxu'a ortaq gewdisi chüshenchisi” we “Yéngi dewrdiki shinjangni idare qilish istratégiyesi” dégenlerning Uyghurlarni xitaylashturush we Uyghur diyarini üzül-késil xitay ölkisige aylandurush ikenlikini namayan qilip berdi. Ayallar qurultiyida bu siyasiy nishanlarning buningdin kéyinki ayallar xizmitining muhim nuqtisi bolidighanliqini jakarlash nöwettiki qirghinchiliq siyasitining ayallarni wasite qilghan halda téximu yuqiri sewiyege yétidighanliqining béshariti, dep qaralmaqta iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.