Антони блинкен: "хитайға, уларниң уйғурларға вә хоңкоңлуқларға йүргүзгән қилмишлириға қарши турдуқ һәмдә башқа дөләтләрниму шундақ қилишқа чақирдуқ"

2021-02-17
Share

16-Феврал, американиң һөкүмәт торида америка ташқи ишлар министери антоний блинкен билән өткүзүлгән радийо сөһбити елан қилинған болуп, бу сөһбәттә антони блинкен сабиқ президент доналд трампниң хитайға қаратқан сияситиниң тәсири вә хитайниң уйғурларға елип барған ирқий қирғинчилиқи һәққидә соралған соалларға җаваб бәргән.

Антони блинкен доналд трампниң сиясити һәққидә тохтилип, униң хитайға қарши туруш сияситиниң тоғр болғанлиқини, әмма хитайға қарши хәлқара бирлик сәп қуралмиғанлиқини ейтқан. Униң билдүрүшичә, америка хитайға тақабил турушта чоқум ғәрб әллири вә башқа дөләтләр билән һәмкарлишиши, хәлқаралиқ тәшкилатларға қайтидин кириши керәк, болмиса буниң орнини хитай игиләп, америкиға бесим қилиду.

Антони блинкен мухбирниң "америка һөкүмити ирқий қирғинчилиқ йүргүзүватқан хитайдәк бир һөкүмәт билән қандақ мунасивәт қилиду?" дегән соалиға җаваб берип мундақ дегән: "бу нәччә он йилдин буян америка дуч келиватқан зор мәсилә. Буниң үчүн биз һәр икки тәрәпкә мувапиқ келидиған бир усулни тепишимиз керәк. Биз һазир кишилик һоқуқ вә демократийәни дипломатийә сияситимизниң ядролуқ орниға қайтуруп келишкә тиришиватимиз. Берма мәсилисидә биз бу сиясий өзгиришни әйблидуқ вә башқа дөләтләрни бирликтә һәрикәт қилишқа чақирдуқ. Хитайға кәлгәндә, уларниң уйғурларға вә хоң коңлуқларға йүргүзгән қилмишлириға қарши турдуқ һәмдә башқа дөләтләрниму шундақ қилишқа чақирдуқ".

Антони билинкен йәнә хитайниң җинайитини тосуш үчүн нөвәттә кишилик һоқуқни дәпсәндә қилишқа четишлиқ мәһсулатларни хитайға експорт қилмаслиқ вә мәҗбурий әмгәккә четишлиқ мәһсулатларни америкиға импорт қилмаслиқниң америка һөкүмити қилалайдиған муһим ишлар икәнликини, 2022-йил бейҗиңда өткүзүлмәкчи болған қишлиқ олимпек мусабиқисиға қатнишиш-қатнашмаслиқ мәсилисигә шу вақит кәлгәндә қарар беридиғанлиқини билдүргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт