Közetchiler: "Judaliq hesriti xitayning rezillikini dunyagha roshen körsitip béridu"

Muxbirimiz jewlan
2021-04-21
Share

Xitayning nurghun Uyghur a'ililirini weyran qilip, alaqe we bérish-kélish yollirini qamal qilishi köpligen tragédiyelik hékayilerni meydan'gha keltürüp, muhim xelq'ara axbarat témilirigha aylanmaqta.

21-Aprél "Diplomat" zhurnilida "Yoqap ketken Uyghur baliliri" namliq bir maqale élan qilin'ghan bolup, 5 yil burun qizidin ayrilghan bir Uyghur anining échinishliq hékayisi bayan qilin'ghan.

Bu yil 47 yashqa kirgen meryem abdulhemid 4-balisini tughush üchün 2016-yil türkiyege kelgen, shu yil 12 yashqa kirgen qizi rizwan'gulning pasporti chiqmighanliqi üchün dadisining qéshida qalghan. Meryem abdulhemid bu qizi bilen axirqi qétim 2017-yil körüshkende qizi: "Dadam qéni? men bu yerde yalghuz qaldim, héchkim méning halimdin xewer almaydu" dégen. Démek, dadisini xitaylar lagérgha élip ketkendin kéyin bu qiz yalghuz qalghan. Xitay hökümiti bu a'ilini qara tizimlikke tiqqandin kéyin urugh-tughqanlirimu uninggha yardem qilalmighan.

Qizining derdide puchulinip, kéche-kündüz azab tartip yürgen meryem abdulhemid muxbirgha: "Bu dunyada adalet nege ketti? qizimni oylap sarang bolay dédim. Eng kichik balam dadisini téxi körmidi. Balilirim yénimgha ekilishke küchüm yetmeydu, chidighuchilikim qalmidi, eger imanim yol qoyghan bolsidi, alliburun ölüwalghan bolattim" dégen.

Közetchilerning qarishiche, xitayning Uyghurlargha yürgüzüwatqan jinayiti pütün dunyani qaplighan bolup, Uyghur diyarida azab tartiwatqan uyghulardin bashqa,

Chet'elde yashawatqan Uyghurlarmu oxshashla qérindashlirining derdide azab chekmekte iken. Ata-anisidin ayrilghan perzentlerning "Ata-anam qéni?" dep choqan kötürüshi, baliliridin ayrilghan ata-anilarning "Balilirim qéni" dep nale-peryad qilishi we ularning xitay konsolliri aldida namayishqa chiqishi xitayning insan qélipidin chiqqan rezil siyasiti we qorqunchluq mahiyitini dunyagha körsitip béridiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet