Җумһурийәтчи президент намзатлириниң муназирисидә хитай мәсилиси талаш-тартиш қилинди

Америка җумһурийәтчи президент намзатлириниң тунҗи нөвәтлик телевизийә бәс-муназириси пәйшәнбә күни өткүзүлди. Бәс-муназиридә, бәзи намзатлар америкиниң хитай билән болған содиси, қәрз мәсилиси вә тор бихәтәрлик мәсилисини талаш-тартиш қилди.

Җумһурийәтчи намзатлар намзати, атақлиқ өй-мүлк содигири доналд трумп, нөвәттә америкиниң интайин мүшкүл әһвалда туруватқанлиқини тәкитләп, униң содида хитайға уттуруватқанлиқини, сода вә чегра мәсилисидә мексикиға уттуруп қоюватқанлиқини билдүрди.

Җумһурийәтчи намзатлар намзати, кентаки штати кеңәш палата әзаси ранд паул, хитайниң америка хәзинә чекини әң көп сетивалған дөләт икәнлики һәққидә тохтилип, “биз хитайдин пул қәрз елип, башқиларға тарқатмаслиқимиз керәк, биз пул тарқитишни немә үчүн бизниң дүшмәнлиримиздин башлап тохтатмаймиз” деди.

Тексас штати авам палата әзаси тәд круз хитайниң тор һуҗумиға қандақ тақабил туруш һәққидә сөзләп, президент обама вә һелари клинтонниң хитай сияситини тәнқид қилди. У, хитайниң америкиға қарши тор уруши қозғиғанлиқини билдүрди.

Нөвәттә, америка җумһурийәтчиләр партийәсидин 17 киши өзини мәзкур партийиниң президент намзатлиқиға көрсәтти. Пәйшәнбә күнки муназиригә 10 намзат қатнашти.