Хәлқара кәчүрүм тәшкилати хитайдин «назарәтчилик қануни» лайиһисини бикар қилишни тәләп қилди

Мухбиримиз ирадә
2017-12-08
Елхәт
Пикир
Share
Принт

Хәлқара кәчүрүм тәшкилати хитай йеқинда елан қилған «назарәтчилик қануни» лайиһиси һәққидә мәхсус бир парчә доклат елан қилди. Алдинқи күни елан қилинған доклаттин мәлум болушичә, «назарәтчилик қануни» лайиһиси хитай җамаәт хәвпсизлик органлириниң қолға елиш, тутуп туруш ишлириға мунасивәтлик икән. Униңдики маддилар хитайдики җамаәт хәвпсизлик тармақлириниң һоқуқ даирисини йәниму кеңәйтип, хитайдики өз мәйличә тутқун қилиш, муддәтсиз тутқун қилиш қилмишлириниң йәниму еғирлишишини кәлтүрүп чиқиридикән.

Хәлқара кәчүрүм тәшкилати бу «қанун лайиһисини» хитай өзи қол қойған «кишилик һоқуқ хитабнамиси» вә башқа алақидар қанунларға хилап, дәп көрсәткән. 

Униңда баян қилинишичә, хитай қол қойған хәлқара қанунлар бойичә, әгәр бир киши тутқун қилинған тәқдирдә у киши вә униң йеқин аилә-тавабатлири тутқунниң тутулуш сәвәби, муддити, тутуп турулуватқан орнидин толуқ хәвәрдар болуш һоқуқиға игә, дәп бекитилгән болсиму, әмма хитай елан қилған бу йеңи «қанун лайиһиси» дә бу маддилар қаттиқ дәпсәндә қилинған икән. 

Хәлқара кәчүрүм тәшкилати доклатида хитай һөкүмитидин мәзкур лайиһини дәрһал бикар қилишни тәләп қилған. 

Чәтәлләрдики уйғур көзәткүчиләр, юқиридики «қанун лайиһиси» ниң уйғурларға биваситә мунасивәтлик икәнликини, әгәр бу мақулланған тәқдирдә буниң уйғур елида давам қиливатқан «халиғанчә тутқун қилиш» «халиғанчә муддәттә тутуп туруш» қилмишлирини қануний асасқа игә қилидиғанлиқини билдүрди. Улар, нөвәттә уйғур елида қурулған «йепиқ тәрбийиләш мәркәзлири» мана бу хил «өз мәйличә тутқун қилиш» ниң әң ярқин өрники, дәп көрсәтти.

Пикирләр (0)
Share
Толуқ бәт