Prézidént donald tramp: “Xitay neq meydanda tutulup qaldi”

Amérika prézidénti donald tramp aldinqi küni twittérda xitayni tenqidlep, uning shimaliy koréyege néfit toshup, “Neq meydanda tutup qalghanliqi” ni bildürdi.

Ötken seyshenbe küni jenubiy koréyening “Chosun ilbo” géziti amérika sün'iy hemralirining boxey déngizida xitay paraxotlirining shimaliy koréye paraxotlirigha néfit yötkewatqanliqini bayqighanliqini xewer qilghan. Xewerde bu ehwalning öktebirdin béri 30 qétimdek yüz bergenlikini bildürgen.

Bu xewer “Fokus xewerler qanili” qatarliq amérika axbarat wasitilirining diqqitini qozghighan idi. Prézidént tramp aldinqi küni twittérda élan qilghan bayanatida “Xitayning neq meydanda tutulup qalghanliqi” ni eskertip, “Xitayning shimaliy koriyeni néfit bilen teminligenlikidin intayin ümidsizlendim,” dégen. U yene “Eger bu mushundaq dawamlashsa, shimaliy koréye mesilisining héchqachan dostane hel qilish charisi bolmaydu,” dep tekitligen.

B d t xewpsizlik kéngishi ilgiri shimaliy koréyening néfit importigha cheklime qoyup, uning cheklik miqdarda néfit import qilishigha yol qoyghan. Emma uning déngizda néfit almashturushini chekligen idi. Lékin birleshme agéntliqining bildürüshiche, xitay hökümiti b d t xewpsizlik kéngishining émbargo qararigha xilapliq qilghanliqini ret qilghan. Xitay tashqi ishlar ministirliqining bayanatchisi xu'a chünying bügünki axbarat élan qilish yighinida xitayning émbargo qararlirini “Omumyüzlük we qattiq” ijra qilip kéliwatqanliqini tekitligen. U, bu heqtiki xewerlerning “Pakitqa uyghun emes” liki, alaqidar paraxotlarning bu mezgilde xitay portigha kirgenliki yaki chiqqanliqigha da'ir héchqandaq xatire yoqluqini bildürgen. Lékin roytérs agéntliqining xewiride qeyt qilishiche, amérika dölet ishliri ministirliqining bir emeldari, “Xitayni öz ichige alghan bir qanche döletning shirketlirige tewe bezi paraxotlarning bu xil tijaret bilen shughulliniwatqanliqigha da'ir dellilirimiz bar,” dégen.