Америкаға кәлгән ши җинпиңға қарши намайишта турсунай зиявудун хитай оқуғучиларниң тосқунлуқиға учриған

Вашингтондин мухбиримиз җәвлан тәйярлиди
2023.11.15

11-Айниң 14-күни, хитай компартийәси баш секретари ши җинпиң американиң сан-франсеско шәһиридә өткүзүлидиған “асия-тинч окян иқтисадий һәмкарлиқ йиғини” ға қатнишиш үчүн кәлгәниди. Ши җинпиңға қарши уйғур, тибәт кишилик һоқуқ паалийәтчилири вә хитай өктичилири ши җинпиң өтидиған йол бойида намайиш тәшкиллигән болуп, ши җинпиңни қоллайдиған вә уни күтүвелишқа чиққан хитайларму шу йәргә келип, намайишчиларға һәйвә көрсәткән.

Ши җинпиңни күтүвелишқа чиққанлар өзлириниң көп санлиқ икәнлики билән намайишчиларға бесим қилған, уларниң авазини бесиқтурушқа, һәрикитини тизгинләшкә урунған; җүмлидин лагер шаһити турсунай зиявудун көтүрүп чиққан көк байрақни хитайниң қизил байриқи билән тосувелишқа урунған. Буларниң хитай һөкүмити яллиған яки өзлири халап кәлгән хитайлар икәнлики билинмәктә.

14-Ноябир күни, “тибәткә әркинлик оқуғучилар уюшмиси” ниң X дә чиқарған видийосида, коммунист хитайға, ши җинпиңға қарши намайишқа чиққан уйғурлар, тибәтләр, хоңкоңлуқлар вә тәйвәнликләрниң паалийити көрситилгән болуп, бир тибәт оқуғучи турсунай зиявудунни көрситип туруп: “мана бу турсунай, уйғур лагер шаһити, ши җинпиң уни бир йил йиғивелиш лагериға қамиған, уни қийниған. Маву хитай оқуғучилар ирқий қирғинчилиқ йүргүзгән шу һакимийәтни қоллап, бу йәрдә номус қилмай қарап турмақта. Уларниң виҗдани йоқму?” дегән. Андин бу оқуғучиларни хитай тәрәпниң пул берип, чүшлүк тамақ берип бу йәргә тошуғанлиқини ейтқан вә “бу оқуғучилар лагер шаһитиға, сениң кәчмишлириң чоң иш әмәс, демәктә. Мана бу коммунист хитайдур” дегән.

Бу намайишқа америка уйғур җәмийити, уйғур кишилик һоқуқ қурулуши қатарлиқ тәшкилатларму иштирак қилған болуп, сан-франсескода әтрапида яшайдиған уйғурларму намайишқа қетилған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.