Amérikagha kelgen shi jinpinggha qarshi namayishta tursun'ay ziyawudun xitay oqughuchilarning tosqunluqigha uchrighan

Washin'gtondin muxbirimiz jewlan teyyarlidi
2023.11.15

11-Ayning 14-küni, xitay kompartiyesi bash sékrétari shi jinping amérikaning san-fransésko shehiride ötküzülidighan “Asiya-tinch okyan iqtisadiy hemkarliq yighini” gha qatnishish üchün kelgenidi. Shi jinpinggha qarshi Uyghur, tibet kishilik hoquq pa'aliyetchiliri we xitay öktichiliri shi jinping ötidighan yol boyida namayish teshkilligen bolup, shi jinpingni qollaydighan we uni kütüwélishqa chiqqan xitaylarmu shu yerge kélip, namayishchilargha heywe körsetken.

Shi jinpingni kütüwélishqa chiqqanlar özlirining köp sanliq ikenliki bilen namayishchilargha bésim qilghan, ularning awazini bésiqturushqa, herikitini tizginleshke urun'ghan؛ jümlidin lagér shahiti tursun'ay ziyawudun kötürüp chiqqan kök bayraqni xitayning qizil bayriqi bilen tosuwélishqa urun'ghan. Bularning xitay hökümiti yallighan yaki özliri xalap kelgen xitaylar ikenliki bilinmekte.

14-Noyabir küni, “Tibetke erkinlik oqughuchilar uyushmisi” ning X de chiqarghan widiyosida, kommunist xitaygha, shi jinpinggha qarshi namayishqa chiqqan Uyghurlar, tibetler, xongkongluqlar we teywenliklerning pa'aliyiti körsitilgen bolup, bir tibet oqughuchi tursun'ay ziyawudunni körsitip turup: “Mana bu tursun'ay, Uyghur lagér shahiti, shi jinping uni bir yil yighiwélish lagérigha qamighan, uni qiynighan. Mawu xitay oqughuchilar irqiy qirghinchiliq yürgüzgen shu hakimiyetni qollap, bu yerde nomus qilmay qarap turmaqta. Ularning wijdani yoqmu?” dégen. Andin bu oqughuchilarni xitay terepning pul bérip, chüshlük tamaq bérip bu yerge toshughanliqini éytqan we “Bu oqughuchilar lagér shahitigha, séning kechmishliring chong ish emes, démekte. Mana bu kommunist xitaydur” dégen.

Bu namayishqa amérika Uyghur jem'iyiti, Uyghur kishilik hoquq qurulushi qatarliq teshkilatlarmu ishtirak qilghan bolup, san-franséskoda etrapida yashaydighan Uyghurlarmu namayishqa qétilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.