Ma shingrüy Uyghur rayonidiki xitay dölet karxanilirining ottura asiya bazirigha “Téximu chongqurlap singip kirishi” ni telep qilghan

Uyghur aptonom rayonluq partkomning sékrétari ma shingrüy 2-dékabir küni Uyghur mejburiy emgikige chétishliq “Jungtey guruhi” ni öz ichige alghan Uyghur rayonidiki xitay dölet karxanilirida tekshürüshte bolghan bolup, dölet karxanilirining ottura asiya bazirigha “Téximu chongqurlap singip kirishi” ni telep qilghan.

“Shinjang géziti” qatarliq rayondiki xitay hökümet taratqulirining xewerliridin melum bolushiche, ma shingrüy Uyghur aptonom rayonluq hökümetning re'isi erkin tuniyazning hemrahliqida 2-dékabir shinjang “Yashin” kömür métan meblegh sélish tereqqiyat guruhi, jungtey guruhi, dongchi soda cheklik shirkiti qatarliq rayondiki xitay dölet karxanilirida tekshürüshte bolghan. Halbuki, xitayning dölet igilikidiki bu karxanilar chet el tetqiqat orunliri teripidin Uyghur mejburiy emgikige zich baghlinishliq, dep qarilip kéliwatqan shirketlerdur.

Amérika ana weten xewpsizliki ministirliqi téxi yéqindila bu karxanilardin shinjang jungtey guruhini qara tizimlikke kirgüzüp, uning mehsulatlirining amérikagha import qilinishini chekligen idi. “Shinjang géziti” ning bildürüshiche, ma shingrüy jungtey guruhida tekshürüshte bolghanda, “Ewzel soda sahelirige ehmiyet bérish, dawamliq tiriship, téxnikiliq qollashni kücheytish, kirimni ashurush we chiqimni azaytishni yaxshi ishleshning zörürlüki” ni tekitligen. Ma shingrüy shinjang dongchi soda cheklik shirkitide tekshürüshte bolghanda, karxanilarning “Shinjangning ornidin, siyasettiki ewzelliktin yaxshi paydilinip, shinjang erkin soda sinaq rayoni qurush pursitini aktipliq bilen ching tutushi, shinjangni baza qilip ottura asiyagha téximu chongqurlap singip kirishi, ‛bir belbagh bir yol‚ liniyesidiki döletlerning bazirini téximu keng échishi” ni ümid qilidighanliqini éytqan.

Uning éytishiche, dölet igilikidiki karxanilar “Shinjangning dölet miqyasidiki istratégiyelik orun ewzellikige merkezlishishi” , rayonning “8 Chong kesip topi” ning qurulush nishanigha egishishi kérek iken. Halbuki, adriyan zénzge oxshash bu sahediki mexsus tetqiqatchilar, ma shingrüy dewride Uyghur mejburiy emgikining téximu kéngeygenlikini qeyt qilmaqta.