Xitayning özek qiyinchiliqi barghanséri éghirliship mangghan

Yéqinda xitayning eqlifon ishlepchiqarghuchisi bolghan “Xu'awéy” özining Mate 60 Pro eqliy iqtidarliq yanfonini bazargha salghandin kéyin, bir qisim axbaratlarda xitayning amérika qoyghan özek jazasini bösüp ötkenliki, xitayning yérim ötküzgüch téxnikisida gherbke yétishiwélish aldida turghanliqi heqqide xewerler tarqalghan.

Biraq, amérikada neshrdin chiqidighan “Barron” (Barron) zhurnilining xewer qilishiche, emeliyet buning eksiche bolup, xitayning özek ishlepchiqirishi téximu teslishiwétiptu.

Maqalide déyilishiche, bu sahediki mutexessisler “Xu'awéy” ning yéngi eqilfonlirida ishlitilgen 7 nanométirliq tügünde yasalghan özekning yéngi emeslikini, xitayning eng chong özek ishlepchiqarghuchi yérim ötküzgüch yasash shirkiti (SMIC) ishlepchiqarghan bu özekning ötken yili bitkoyin tenggisini qézish üchün ishlitilgenlikini bayqighan.

Téximu konkrét qilip éytqanda, 7 nanométirliq özek, alma shirkiti özining 2018-yili ishlepchiqarghan ayfonliri (iPhone) da ishletken özekler bilen oxshash bolup, yuqiri pen-téxnikada 5 yil arqida qélish dégenlik nahayiti uzun waqit hésablinidiken.

“Barron” ning déyishiche, “Xu'awéy” shirkitining bu nöwet yéngi téléfonlirini bazargha salghanda, burunqining eksiche köp tentene qilmasliqimu bu perezni küchlendüridiken, emma ular bu heqtiki so'allargha jawab bermigen. Maqalide déyilishiche, xitayning bu sahede algha ilgirilishide ikki tüp mesile bar bolup biri, xitay téxi 7nm din halqip, 5nm we 3nm liq özeklerni yasash ötkilidin ötelmigen. Biraq bu téxnika amérikada alliqachan kesip ölchimige aylinip bolghan.

Yene biri, xitayning qolida bar bolghan 7nm téxnikisi bilen özek yasashni dawamlashturush üchün yérim ötküzgüch yasashta intayin muhim bolghan we DUV dep atilidighan litografik zapchas we sistémisini yéngilap turushi kérekken. Emma bu zapchaslarni yasaydighan eng chong ishlepchiqarghuchi bolghan gollandiyediki ASML Holding  shirkiti, bu yil 1-séntebirdin bashlap xitaygha qaratqan litografik cheklimisini yenimu kéngeytken. Xitay eger özek ishlepchiqirishni saqlap qélish üchün zörür bolghan zapchas we mulazimetlerge érishelmise, uning hazirqi DUV sistémisimu buzulushi mumkinken.

Qisqisi, yérim ötküzgüch yasash téxnikisida xitay gherbtin xélila arqida qalghan bolup, uning pat yéqinda yétishiwélishimu éhtimalgha yéqin emesken.