Уйғур аптоном районлуқ дөләт хәвпсизлики назаритиниң назири тйән йоң ш у а р тәптиш мәһкимисиниң партком секритарлиқиға тәйинләнгән

Мухбиримиз әркин
2021-12-17
Share

Хитай даирилири уйғур елидики әң чоң җасуслиқ органи болған дөләт хәвпсизлики назаритиниң назири тйән йоңни уйғур аптоном районлуқ тәптиш мәһкимиси парткоминиң секритари қилип йөткигән. Хитайниң бу орунлаштурушта қандақ амилларни көзда тутқанлиқи ениқ болмисиму, бирақ вәзипә алмаштурушниң хәлқарада хитайниң уйғурларға йүргүзиватқан “ирқий қирғинчилиқ” җинайитини җавабкарлиққа тартиш чуқанлири күнсери күчийитатқан бир вақитта йүз бериши диққәт қозғимақта.

“шинҗаң хәвәрлири” ториниң ашкарлишичә, уйғур аптоном районлуқ дөләт хәвпсизлики назаритиниң партком секритари вә назири тйән йоң, уйғур аптоном районлуқ тәптиш мәһкимисиниң партком секритарлиқиға йөткәлгән.

Хәвәрдә тйән йоңниң конкирет қачан бу вәзипигә йөткәлгәнлики ейтилмиған болсиму, бирақ униң аптоном районлуқ дөләт хәвпсизлики назаритиниң назири болуп вәзипә өтигән мәзгилдә “сиңип киришкә, ағдурмичилиққа, бөлгүнчиликкә, хурапатлиққа вә терорлуққа қарши күрәшни чоңқурлаштурғанлиқи” тәкитләнгән. Хәвәрдә ейтилишичә, у йеқинда йәркән наһийәсидә тәкшүрүштә болғандиму 6 нуқтилиқ тәләпни оттуриға қойған. У бу 6 нуқтиниң биринчисидә “баш нишанни чөридәп, омумий ‍иҗтимаий вәзийәтниң муқим болушини қоғдаш” ни тәләп қилған икән.

Көзәткүчиләрниң ейтишичә, хитай һөкүмитиниң 2017-йили башланған чоң тутқунида райондики тәптиш органлириниң асаслиқ вәзиписи лагердики тутқунларни тәкшүрүш вә бир тәрәп қилишқа қаритилған икән. Көзәткүчиләр, бу мәзгил ичидә он миңлиған уйғур тутқунларниң қануний рәсмийәтсиз җазаланғанлиқи, нөвәттә хитай һөкүмитиниң бу җинайитини йошурушниң пейиға чүшкәнликини билдүрмәктә. Уларниң ейтишичә, тйән йоңниң бу вәзпигә қоюлуши шуниң билән мунасивәтлик икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт