Xitay hökümiti Uyghur diyaridiki paxta ishlepchiqirishida mashinilishishni emelge ashurdimu?

Xitayning shinxu'a agéntliqining 30-maydiki xewiride Uyghur diyaridiki paxta ishlepchiqirish saheside mashinilishishning pütünley emelge ashqanliqi, kéwez térishtin tartip taki dora chéchish we hosul yighishqiche bolghan pütkül jeryanda adem küchi ishlitilmeydighanliqi bayan qilin'ghan.

Xewerde éytilishiche, 2023-yili Uyghur diyaridiki kéwezlikning kölimi ilgiriki yillardikidinmu kéngeytilgen bolup, mehsulat miqdarimu munasip halda éship mangghan. Ular buningdiki muhim sewebler qatarida yuqiri pen-téxnika amilining muhim salmaqni igiligenlikini, kéwez térishta mashina bilen térish, oghut chéchishta ademsiz uchqu ishlitish, paxta térishta shopursiz paxta térish mashinisi ishlitishning emelge ashqanliqini tilgha alghan. Shuningdek xitay déhqan du key arqiliq “Bowamning zamanisida hemmila ishni adem küchi bilen qilghachqa on mo yerning paxtisini térishqa bir adem 45 kün ishleshke toghra kélidikentuq. Hazir hemmila ishni mashina bilen qilidighanliqimiz üchün birer yüz mo yerning paxtisini birnechche sa'ettila tamamlaymiz” dégen.

Uyghur diyaridiki paxta ishlepchiqirish sahesi izchil dunya jama'itining tenqid obyékti bolup kéliwatqan bolup, Uyghurlarning mejburiy emgiki eng köp serp bolidighan sahelerning biri, dep qarilip kelgen. Lagérshunas alimlardin adryan zénz 16-may küni “Chet'el siyasiti” zhurnilida élan qilghan bu heqtiki maqaliside bu mesile heqqide alahide toxtilip ötken hemde : “Shinjangda hazir paxta ishlepchiqirish saheside mejburiy emgek burunqidek köp közge chéliqmas boluwatidu. Emeliyette bolsa bu xildiki mejburiy emgekning salmiqi hazir burunqidinmu éghirlawatidu” dep xulase chiqarghanidi.