Xitay hökümitining xelq'ara paxta bazirini monopol qilish üchün élip bériwatqan urunushliri ashkara bolmaqta

Muxbirimiz shadiye
2023.05.04

Xitay hökümiti amérika bashchiliqidiki gherb ellirining Uyghur rayonida mejburiy emgek bilen bulghan'ghan paxta mehsulatlirigha qoyghan qattiq émbargosidin qutulush, xelq'ara paxta bazirining yochuqlirini échish üchün, türlük amal-charilerni izdeshke bashlighan.

Xitayning “Sanji géziti” ning xewirige qarighanda, yéqinda sanji shehiride 2023-yili Uyghur rayonida yuqiri süpetlik paxta ishlepchiqirishni tereqqiy qildurush üchün, mexsus muhakime yighini ötküzülgen. Xewerde éytilishiche, bu qétimliq yighin'gha xitayning pen-téxnika, sana'et we yéza-igilik saheliridiki munasiwetlik tetqiqatchilar we mutexessisler neq meydan hem tor arqiliq qatnashqan.

Xewerde déyilishiche, xelq'ara paxta bazirini tehlil qilish we Uyghur rayonida yuqiri süpetlik paxta ishlepchiqirishni ilgiri sürüsh muhim nuqta qilin'ghan bu yighinda, xitay mutexessisliri paxta ishlepchiqirishtiki kona téxnikilarni yéngilash, kölemni téximu kéngeytish, adem küchisiz déhqanchiliq meydani qurush we ela süpetlik paxta ishlepchiqirishtek birqanche nishanni muhakime qilghan.

Xitayning “Tengritagh tori” ning eng yéqinqi xewerlirige qarighanda, xitay da'iriliri, bir tereptin Uyghur rayonidiki kéwezliklerni “Sün'iy eqil” arqiliq bashqurup, mehsulat ünümini téximu yuqiri kötürüshke urunsa؛ yene bir tereptin xelq'ara paxta bazirini analiz qilip, paxta mehsulatlirini qandaq qilip xelq'ara bazargha keng-kölemde kirgüzüshning yochuqlirini izdeshke bashlighan.

Xitayning “Ela süpetlik paxta ishlepchiqirish” we “Xelq'ara paxta bazirini tehlil qilish” toghrisidiki bu mexsus yighini, xitayning amérikani asas qilghan gherb ellirige qiliwatqan paxta mehsulatliri ékisporti qattiq zerbige uchrawatqan, bolupmu amérika hökümiti “Uyghur mejburiy emgikining aldini élish qanuni” din ünümlük paydilinip, xitayning paxta mehsulatlirini amérika tamozhnasida tutup qéliwatqan bir waqitta échilghan.

Xitay da'iriliri amérika bashliq gherb ellirining émbargosidin qéchish üchün, Uyghur rayonida ishlepchiqirilghan paxta mehsulatlirini wiyétnam, tayland qatarliq sherqiy-jenubiy asiya döletlirige chiqirip, “Üchinchi dölet” arqiliq gherb bazarlirigha ékisport qilishqa urun'ghan idi. Halbuki, roytérs agéntliqining ötken heptidiki xewiride, amérikaning mejburiy emgekni cheklesh qanuni arqiliq “Shinjang paxtisi” ni xam eshya qilip kiyim-kéchek ishlepchiqiriwatqan wiyétnam karxanilirigha zerbe bergenliki ilgiri sürülgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.