Jim kraymér: “Xitayning pay cheklirige hergizmu yéqin kelgülük emes!”

Muxbirimiz eziz
2022-01-06
Share

Amérika pay chéki baziri heqqidiki iqtisadiy mulahizide közge körün'gen pul-mu'amile analizchisi jim kraymér yéqinda CNBC téléwiziyesining xitay pay chekliri heqqidiki so'allirigha jawab bérip “Men héchkimge xitay pay cheklirini sétiwélishni tewsiye qilmaymen. Ularning pay cheklirige hergizmu yéqin kelgülük emes” dégen.

5-Yanwardiki widiyo ziyaritide jim kraymér bu heqte toxtilip xitay re'isi shi jinpingning kapitalizmni yaxshi körmeydighanliqini, shundaqla bundaq bir diktatorning qol astidiki döletning pay chekliride héchqandaq ishench bolmaydighanliqini alahide tekitligen. U bu heqtiki sözlerni bezi amérika shirketlirining xitay pay chéki bazirigha meblegh sélip qoshlap payda alghanliqi heqqidiki xewerge baha bergende qilghan. Shundaqla bezilerning “Ali baba”, “Beydu” qatarliq xitay pay cheklirini élip bay bolghanliqigha qarapla xitay pay cheklirige shölgey éqitishning exmeqliq bolidighanliqini alahide tekitleydu.

Buninggha oxshap kétidighan sözni “Zayom padishahi” leqemlik meblegh salghuchi jéffériy gundlakmu qilghan bolup؛ “Xitaygha meblegh sélishqa bolmaydu. Chünki ularning uchurliri yalghan. Amérika-xitay munasiwitidimu ishench yoq. Xitaygha salghan meblighingiz bir kéchidila musadire qilinip kétishi mumkin” dégen.

Melum bolushiche, amérika-xitay munasiwitining yirikliship méngishi muqimliship qéliwatqanda xitaygha meblegh sélish yaki xitayning nyo-york pay chéki baziridiki paylirini sétiwélish heqqide köpligen munaziriler otturigha chiqmaqtiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet