“Forbés” zhurnili: “Xitay zor pul-mu'amile krizisigha duch kelmekte”

Amérikaning “Forbés” zhurnili 3-öktebir élan qilghan bir maqalide, xitayning pul-mu'amile krizisi éghirlishiwatqanliqi, uning “Zor kriziske duch kéliwatqanliqi” ni bildürgen. Maqalide éytilishiche, xitay bankiliri amanet qerzdin tartqan ziyanlirigha zapas pul teyyar qilishta xitay zayum bazirigha yüzlen'gen bolup, zayum baziri arqiliq érishken zapas fondi ötken yilqidin 30 pirsent artqan. Maqalide éytilishiche, bu buningdin bir yil awwal xitayning eng chong öy-mülük shérkiti bolghan xéngda guruhining 300 milyard dollar qerzini töliyemeydighanliqni élan qilishi bilen bashlan'ghan krizisning yene bir basquchi iken.

“Forbés” zhurnilining yazghuchisi milton ezrati teripidin qelemge élin'ghan mezkur maqalide, xitayning bu krizisning kéngiyishini toxtitish üchün keskin tedbir élishni ret qilghanliqini, béyjing keskin tedbir almighiche bu krizisning dawamlishidighanliqini bildürgen. Maqalide yene pul-mu'amile mesilisining iqtisadqa éniq tesiri bolidighanliqi, xitay iqtisadining ajizliq nuqtisi aliqachan roshenleshkenlikini, gerche xitay hökümiti ul eslihelerge köplep meblegh salghan bolsimu, emma bu uning bu yilqi iqtisadining éshishini 5.5 Pirsetke yetküzüsh pilanidin köp töwen bolushi mumkinlikini bildürgen.

Maqalide éytilishiche, nurghun kishiler xitay iqtisadining chöküshini uning yuqumgha qarshi karantin tedbirlirige baghlisimu we buning rol oynishi shübhisiz bolsimu, lékin buningda béyjing we gherb taratqulirining sel qarishigha qarimay pul mu'amile krizisining chongqur tesiri bolidighanliqini éytqan. Maqalide éytishiche, béyjing xéngda guruhi qerzni töliyelmeydighanliqini élan qilghan waqitning ‍özide derhal tedbir qollan'ghan bolsa, hazirqi iqtisadiy iztiraptin xaliy bolghili bolattiken. Maqalide béyjing da'iriliri tedibr almighansiri, xitaydiki pul-mu'amile krizisi tesirining téximu shiddetlik bolidighanliqini bildürgen.