Америка хитай банкилириниң доллар оборот қилишини чәклиши мумкин

Америка президенти доналд трамп имзалиған “хоңкоң аптономийә сиясити қануни” дики маддилар бойичә хитай һөкүмитиниң хоңкоңни бастурушиға шерик дәп қаралған хитай банкилири йәршари пул-муамилә системисидин зор дәриҗидә чәклиниши мумкин икән.

Америка президенти доналд трамп 14-июл күни имзалиған “хоңкоң аптономийә сиясити қануни” бойичә әгәр һәрқандақ банка америка тәрипидин җазаланған әмәлдарлар билән сода қилса америка банкилиридин қәрз елишини чәкләш, пул алмаштуруш, банка содисиға қатнишиш вә пай һоқуқиға мәбләғ селишини чәкләш қатарлиқ җаза тәдбирлири билән җазалинидикән. Америка һөкүмити йәнә бекитилгән органларниң мал-мүлүклирини тоңлитиши мумкин икән.

Мәлум болушичә, американиң җаза тәдбирлири “хитай банкиси” “хитай сода-санаәт банкиси”, “хитай қурулуш банкиси” қатарлиқларни көздә тутуп түзүлгән болуп, йәршари пул-муамилә системисидин чәклиниш хитай үчүн зор хәвп һесаблинидикән.

Көзәткүчиләр буниң хитай һөкүмити үчүнму наһайити чоң бесим болидиғанлиқини билдүргән.

Билумберг ахбарат агентлиқиниң хәвиригә қариғанда, хитайниң 4 чоң дөләт илкидики банкиси хитай карханилириниң сода оборотини бир тәрәп қилипла қалмай, йәнә бейҗиңниң “бир бәлвағ бир йол” ул әслиһә қурулушиниму мәбләғ билән тәминләйдикән.

Әгәр американиң җаза тәдбири ишқа киришсә, хитай банкиси буниң зәрбисигә әң қаттиқ учрайдикән. Номура тәтқиқат орниниң тәтқиқатчиси такахиде киючи “асияға қарап чиқиш” намлиқ гезиткә қилған сөзидә “әгәр һәқиқәтән шундақ болса, чәтәлдә сода қилидиған хитай ширкәтлири америка доллирини йөткийәлмәслики вә нәтиҗидә хитайниң содиси тәбиийла азийиши мумкин,” дегән.

Көзәткүчиләр буни америка һазирғичә хитайға йүргүзгән әң зор җазаларниң бири болуп қелиши мумкин, дәп қаримақта.