Хитай һөкүмити һәр қанчә чарә қоллансиму, хитай пулиниң давамлиқ пахаллишиш еһтимали бар икән

Хитай иқтисадиниң чекинишигә әгишип, хитайниң пай чеки базири чүшүп, хитай пулиниң қиммити давамлиқ төвәнләватқан болуп, бу әһвалда хитай пулиниң дуня пул-муамилә саһәсидә долларға охшаш инавәт қазиниши наһайити қийин икән.

“бломберг хәвәрлири” ториниң 21-авғуст күни хәвәр қилишичә, хитай пулиниң бир долларға тәң келидиған қиммити өткән һәптидила 7 йүән 30 сенттин һалқиған болуп, өткән йилдин буянқи әң төвән нуқтиға чүшүп қалған. Хитай банкиси қайтурма һуҗумға өтүп, долларни пахал қилип сатидиғанлиқини давраң қилған. Әмма һазир долларму мәлум нисбәттә пахаллишиватқан болуп, хитай тәрәп гәрчә қолидики долларни бир тәрәп қиливәтсиму, хитай пулиниң давамлиқ пахаллишишини тосуп қалалмайдикән.

Хитай һөкүмити хитай пулиниң қиммитини сақлап қелиш үчүн қәрзниң өсүм нисбитини чүшүрүш усулини қолланған, америка болса өсүм нисбитини өстүргән, бу әһвалда хитай пулиниң қиммити йәнә 9 пирсәнт әтрапида төвәнләйдикән. Хитай пулиниң бир долларға тәң келидиған қиммити 7 йүән 50 синтқиму берип қалидикән.

Хәвәрдә көрситилишичә, хитай һөкүмити әзәлдин пул-муамилә системисини бир қоллуқ башқуруп келиватқан болуп, бурун бир мәзгил хитай пулини пахаллаштуруш арқилиқ содида нәп елиш тактикисини ишқа салған. Әмма бундақ қилишниң хәтириму бар болуп, әгәр хитай иқтисади бир қәдәр күчлүк болмиғинида, хитай пулиниң курси бирақла чүшүп кетип, иқтисадий кризис келип чиқидикән.

Хитай һөкүмити илгири хитай пулини биразилийә, русийә, һиндистан вә җәнубий африқадин ибарәт “кесәк дөләтләр” иттипақиниң козир пули қилип, хәлқарада долларниң орниға дәсситишкә урунуп келиватқаниди; нөвәттә хитай иқтисади чекиниватқан бу вәзийәттә хитай пулиниң курси чүшүп, хәлқарада инавәтлик пул бирлики болуш еһтималиму зор дәриҗидә төвәнләйдикән.