Amérika tashqi ishlar ministirliqi xitayning omumiy xelq jasusluqqa qarshi turush herikitidin endishe qiliwatqanliqini bildürdi
2023.08.03
Amérika tashqi ishlar ministirliqi 2-awghust küni xitayning omumiy xelq jasusluqqa qarshi turush seperwerlik chaqiriqigha qarita inkas bildürüp, xitayning puqralirini bir-birini nazaret qilishqa ilhamlandurushidin endishe qiliwatqanliqini bildürdi.
Bu heptining bashlirida xitay dölet xewpsizliki ministirliqi uqturush élan qilip, “Jasusluqqa qarshi turushta pütün jem'iyetni seperwer qilish” qa chaqiriq qilghan. Xitay dölet xewpsizliki ministirliqi shexslerning gumanliq heriketlerni pash qilish qanili qurulghanliqi, pash qilghuchilarning teqdirlinidighanliqi we mukapatlinidighanliqini élan qilghan idi. Amérika tashqi ishlar ministirliqining bayanatchisi metéw millér (Mathew Miller) 2-awghust muxbirlarni kütüwélish yighinida, amérikaning buningdin intayin endishe qiliwatqanliqini bildürgen.
U mundaq dégen: “Bizning buningdin endishilirimiz bar. Puqralarni bir-birini nazaret qilishqa ilhamlandurush, elwette kishini qattiq endishige salidu.” metéw millérning éytishiche, buningdin burun amérika xitaygha sayahetke baridighan puqralirigha 3-derijilik agahlandurush chiqarghan iken. 3-Derijilik agahlandurush, amérika hökümitining puqralirini melum bir döletke sayahetke “Bérish-barmasliqni qayta oylishish” qa chaqirishini körsitidiken. Amérika tashqi ishlar ministirliqining xitayning jasusluqqa qarshi turush seperwerlik herikitidin endishe qiliwatqanliqini bildürüshi we xitaygha “Bérish-barmasliqni qayta oylishish” ni telep qilishi, chet eldiki Uyghurlar arisida tughqan yoqlap Uyghur éligha bérish-barmasliq mesilisi qattiq talash-tartish qozghighan bir waqitta otturigha qoyuldi.
Bu talash-tartishni yéqinda chet el tewelikidiki qismen Uyghurlarning xitay wizisi élip, Uyghurlargha qarita “Irqiy qirghinchiliq” qiliniwatidu, dep qariliwatqan Uyghur élida tughqan yoqlashta bolushi we weziyetning “Normallashqanliqi” heqqidiki widéyolarni ijtima'iy taratqularda keng tarqitishi keltürüp chiqarghan. Chet ellerdiki teshkilatlar, bu xil tughqan yoqlash xitayning “Shinjang hékayisini yaxshi sözlesh” herikitining bir parchisi ikenlikini ilgiri sürgen idi. Xitayning “Jasusluqqa qarshi turush qanuni” bu yil 7-aydin bashlap resmiy ijra qilinishqa bashlighan.