Xitayning partlatquch dora (porox) teminlishige tayinip qalghan yawropaning kelgüsi endishe qozghimaqta

Washin'gtondin muxbirimiz jewlan teyyarlidi
2024.04.24

Xitay hazir yawropa döletlirining dölet mudapi'e sana'itige kéreklik xam eshya teminleshte hel qilghuch rol oynawatqan dölet bolup qalghan؛ ukra'inagha hujum qilip, yawropagha tehdit séliwatqan rusiyeni astirtin yölewatqan xitayning yawropa döletliri üchün oq-dora teminleshte kem bolsa bolmaydighan dölet bolup qélishi yawropaning herbiy sana'et mes'ullirini endishige séliwatqan bir mesile bolup qalghan. 

“Siyasetchi” zhurnilining yéqinda bu heqte bergen xewiride éytilishiche, yawropa ittipaqining  eng muhim dölet mudapi'e sana'iti mes'uli, shiwétsiye awiyatsiye  we dölet mudapi'e shirkiti (Saab) diréktori maykél johanson (Micael Johansson) yawropa ittipaqidiki her qaysi döletlerning xitay yasighan poroxlargha bekla tayinip qalghanliqini, eger bu teminlesh toxtap qalsa yawropaning halining xeterlik bolidighanliqini, bu xeterning yawropadin halqip hetta afriqighimu yétip baridighanliqi, shunga porox qatarliq oq-dora teminlesh menbesini, bolupmu rakétalarning tézlikini ashuridighan katalizatorluq dorilarni teminlesh menbesini köp xillashturush kéreklikini bildürgen.

Xewerde körsitilishiche, ukra'ina urushi bashlan'ghandin buyan, yawropadiki dölet mudapi'esi shirketliri bésimgha duch kelgen. Ular ukra'inagha yardem bérish hemde öz dölitining mudapi'esini kücheytish üchün  téximu köp qoral we oq-dora ishlepchiqirishqa muhtaj bolsimu, teminlesh yéterlik bolmighan. Ukra'ina hazir rusiyening arqimu arqa hujum qilishigha aran chidashliq bériwatqan bolup, gherb döletlirining ukra'inagha yéterlik yardem bérelmesliki hélitinla urush netijisige tesir körsetmekte iken.

Yawropa ittipaqi komitétining mölcherige asaslan'ghanda, 2026-yilining béshighiche, yawropa ittipaqi her yili 2 milyon dane zembirek oqi ishlepchiqirishi kérek iken, emma uni ishlepchiqirishqa kéreklik partlatquch dora, yeni porox kemchil iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.