Xitayning “Xongkong xewpsizlik qanuni” ni maqullishi zor ghulghula peyda qildi

Muxbirimiz eziz
2020.06.30
Share on WhatsApp
Share on WhatsApp

Xitay memliketlik xelq qurultiyi 30-iyun küni “Xongkong xewpsizlik qanuni” ni maqullap, buning shu kündin étibaren resmiy ijra bolidighanliqini jakarlidi. Xitay re'isi shi jinping shu küni mezkur qanun heqqide re'is buyruqi élan qilip uninggha imza qoyghan.

Amérika simliq xewerler tori (CNN) ning 30-iyundiki xewiride éytilishiche, mezkur qanunning asasiy mezmuni boyiche xongkong tewesidiki xitaydin ayrilip chiqish yaki xitay hökümitining nopuzini aghdurush xaraktéridiki herqandaq qilmish, shuningdek chet'el küchliri bilen hemkarlishish we bashqa “Térrorluq” heriketlirini buningdin kéyin xitay hökümiti jinayi ishlar délosi qatarida bir yaqliq qilalaydiken.

“Amérika xewerliri” ning 30-iyundiki xewiridin melum bolushiche, “Xongkong xewpsizlik qanuni” resmiy élan qilin'ghuche uning mezmuni jama'etke ashkarilanmighan. Shunga xongkongda héchkimmu bu qanunda némilerning éytilghanliqidin xewersiz turghan. Emma xongkong alahide rayonining “Béyjingperes” dep qariliwatqan bash ijra'iye emeldari kerriy lam bu toghriliq söz qilip “Mezkur qanunning xelq qurultiyida maqullan'ghanliqini qizghin alqishlaymiz” dégen.

Xewerde éytilishiche, bu qanunning maqullinishi mahiyette xongkongning “Aptonomiye” lik orni üzül-késil xarab bolghanliqqa barawer iken. Chünki 23 yil ilgiri xitay hökümiti xongkongni en'gliyedin qayturuwalghanda “Xongkongning hazirqi qanun sistémisi 50 yilghiche özgermeydu” dep jakarlighaniken. Emdilikte bolsa bu qanun xongkongdiki démokratik yosunda otturigha chiqishi mumkin bolghan béyjinggha qarshi herqandaq heriketni “Jinayet” dep békitip bir yaqliq qilishqa yol achidiken.

Mezkur qanun maqullan'ghandin kéyin xongkongdiki bir qisim kishiler “Xongkonggha erkinlik!”, “Inqilab bashlansun” dep sho'ar towlighan. Nurghunlighan puqrawi teshkilatlar bolsa özlirining bundin kéyinki pa'aliyetlirining éghir cheklimilerge uchraydighanliqidin endishe qiliwatqanliqini bildürgen. En'gliye we amérika hökümetlirimu özlirining buningdin teshwishliniwatqanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.