Xitay “Shinjang qoralliq saqchi qisimliri” ning mu'awin shtab bashliqini azadliq armiyening xongkongda turushluq qisimlirining qomandanliqigha yötkigen

Xitay re'isi shi jinping Uyghur élide 2017-yili bashlan'ghan chong tutqun jeryanidiki basturushta aktip rol oynighan “Shinjang qoralliq saqchi qisimliri” ning mu'awin shtab bashliqi péng jingtangni xitay azadliq armiyesining xongkongda turushluq qisimlirining qomandanliqigha yötkigen. “Blumbérg xewerliri” agéntliqining bildürüshiche, shi jinpingning qarari xitayning xongkongda téximu qattiq bixeterlik wasitilirini ishlitishige bolghan endishisini téximu kücheytken.

Xitay dölet mudapi'e ministirliqining bayanatida, shi jinpingning telipige bina'en général mayor péng jingtangning azadliq armiyening xongkong garnizon qomandanliqigha teyinlen'genliki éytlghan. Buningdin burun péng jingtang “Shinjang qoralliq saqchi qisimliri bash etriti” ning mu'awin shtab bashliqiliq wezipisini ötigen bolup, amérika hökümiti xitayning bu rayondiki siyasitining irqiy qirghinchiliq teshkil qilidighanliqini élan qilghanidi.

Xitay taratqulirining ashkarilishiche, péng jingtang xitayning 2017-yili bashlan'ghan chong tutquni jeryanidiki atalmish “Térrorluqqa” qarshi turush heriketliride intayin aktip rol oynighaniken. U bu mezgilde “Shinjang qoralliq saqchi qismi” ning “Tagh bürkiti” namliq alahide etritining komandiriliq wezipisini ötigen.

Xitay taratqulirida “Tagh bürkiti” namliq bu etretning 2016-yil kéyin teshkil qilin'ghanliqi ilgiri sürülgen. Péng jingtang 2019-yili xitayning “Yershari waqti” gézitige qilghan bir qétimliq sözide, “Tagh bürkiti” etirining 2018-yili ishletken oq-doriliri “Shinjang qoralliq saqchi qismi” ning térrorluqqa qarshi qalghan alahide etretliridin üch hesse köp bolghanliqini bildürgen. Lékin u, bu üch hesse köp oq-dorining némige ishlitilgenlikini éytmighan.