Хитайниң 14-нөвәтлик мәмликәтлик хәлқ қурултийиға қатнишидиған аталмиш “шинҗаң вәкиллири”ниң тәркиби диққәт қозғимақта

Мухбиримиз ирадә
2023.03.02

Хитайниң 14-нөвәтлик мәмликәтлик хәлқ қурултийи 5- март күни бейҗиңда башлиниш алдида турмақта. Мәзкур қурултайға уйғур елидин баридиған омумий вәкил сани 60 нәпәр болуп, уларниң аран 22 нәпири уйғур.

Хитай һөкүмити тарқатқан рәсмий нопус истатескилирида уйғурларниң нопуси 11 милйондин артуқ дейилгән болуп, бу уйғур аптоном райони омумий нопусниң 45 пирсәнтини тәшкил қилиду. Хитай нопуси болса 10 милйон болуп, омумий нопусниң 40 пирсәнтини тәшкил қилиду. Һалбуки, уйғур аптоном районидин хитай мәмликәтлик хәлқ қурултийға барған 60 вәкил ичидә уйғурларниң аран 22 нәпәр болуши, көзәткүчиләрниң диққитини қозғимақта.

Көзәткүчиләр, хитай тарқатқан һөкүмәт истатескисиға асасланғандиму аталмиш “шинҗаң вәкиллири” ичидә уйғурларниң техиму көп вәкиллик орниға еришиши лазимлиқини тәкитләшмәктә. Америкадики уйғур зиялийси елшат һәсән әпәнди радийомизға қилған сөзидә “уйғурларниң райондики вәкиллик орниниң қәстән азлитиливатқанлиқини” әскәртип өтти.  

Хитайниң шинхуа торида тарқитилған тизимликкә қариғанда, хитай мәмликәтлик хәлқ қурултайға қатнишидиған уйғур вәкилләр әркин тунияз, шөһрәт закир вә зумрәт обул қатарлиқ хитай компартийәсигә қаттиқ садиқлиқи билән тонулған аталмиш “вәкил”ләрдин  тәркиб тапқан икән.

Хитайниң 14-нөвәтлик мәмликәтлик хәлқ қурултийиниң тунҗи йиғини 2023-йили 3-айниң 5-күни башлинидиған болуп, хитай хәлқ сияси мәслиһәт кеңиши 14-нөвәтлик мәмликәтлик комитетиниң биринчи йиғиниму охшаш вақиттта, йәни 2023-йили 4-март күни башлинидикән.

Ши җинпиң башчилиқидики хитай нөвәттә русийәниң украинаға қаратқан таҗавузчилиқини қоллиши, уйғурларға ирқий қирғинчилиқ йүргүзүши вә дөләт ичи – сиртида қаттиқ қоллуқ “чилбөрә сиясити” йүргүзүши билән әйибләнмәктә. Мушундақ бир пәйттә ечилидиған бу “икки қурултай” хәлқараниң диққитини қозғимақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.